Shkup, 15 gusht Zhurnal.mk – Aktualisht, 24 përfaqësi diplomatike-konsullore të Maqedonisë së Veriut janë pa ambasador ose konsull të përgjithshëm, bëjnë të ditur nga Ministria e Punëve të Jashtme për „Fokus“. Për 11 prej tyre tashmë janë përzgjedhur kandidatët, të cilët pritet të marrin detyrën në periudha të ndryshme, pas përfundimit të procedurave ligjore.
Bëhet fjalë për përfaqësitë në Athinë, Budapest, Bukuresht, Kajro, Kanberra, Londër, Prishtinë, Sarajevë, Sofje, Stokholm dhe Hagë.
Nga MPJ-ja bëjnë të ditur se deri në fund të gushtit pritet të nisin mandatet ambasadorja në Londër Ilina Mangova, ambasadorja në Hagë Linda Salieska-Iljazovska dhe ambasadori në Kanberra Stojançe Kitanovski.
Në qershor, Mangova, Salieska dhe Kitanovski prezantuan platformat e tyre për aktivitetet diplomatike para Komisionit parlamentar për Politikë të Jashtme. Ndërsa në maj, të njëjtën procedurë e kaluan edhe Fadil Zendeli, Dimitar Bllazhevski dhe Vele Trpevski, të cilët prezantuan platformat para se të niseshin në shërbim diplomatik në Kopenhagë, Kiev dhe Tiranë.
Nga MPJ-ja thonë se paralelisht po zhvillohen bisedime mes Ministrisë së Punëve të Jashtme dhe Tregtisë së Jashtme, Qeverisë dhe Presidentes së shtetit për përcaktimin e kandidatëve të rinj që do të plotësojnë pozitat vakante.
Procedura ligjore parashikon që MPJ-ja të propozojë kandidatin për ambasador, pas së cilës kërkohet mendimi dhe pëlqimi i Presidentes, ndërsa më pas edhe agremani nga shteti ku dërgohet ambasadori. Kandidati duhet të kalojë edhe Komisionin parlamentar për Politikë të Jashtme, pas së cilës Qeveria merr vendim formal dhe Presidentja nënshkruan dekretin për emërim.
Ministri i Punëve të Jashtme Timço Mucunski më herët deklaroi se po punohet intensivisht për plotësimin e vendeve vakante në rrjetin diplomatik. Sipas tij, mbi 60 për qind e kandidatëve të rinj janë diplomatë karriere me mbi 20 vite përvojë në ministri.
Mucunski ka deklaruar se ndryshimet në Ligjin për Punët e Jashtme parashikojnë që të paktën 50 për qind e drejtuesve të përfaqësive diplomatike-konsullore të jenë ambasadorë nga radhët profesionale të MPJ-së, ndërsa në praktikë kjo përqindje tashmë është mbi 60 për qind.
Maqedonia e Veriut ka 43 ambasada dhe 9 konsullata të përgjithshme.
Pas ndryshimit të pushtetit në vitin 2024 dhe ardhjes në qeveri të VMRO-DPMNE-së, u tërhoqën mbi 10 ambasadorë të emëruar gjatë qeverisjes së mëparshme të LSDM-së. Në tetë raste, arsyeja formale ishte se ambasadorët nuk kishin kaluar dëgjimin në Komisionin parlamentar për Politikë të Jashtme.
Mes ambasadorëve që iu ndërpre mandati ishin Ljubomir Fërçkoski, ish-ambasador në misionin e OKB-së në Nju Jork, Andrej Zhernovski, ish-ambasador në Rumani, dhe Vesel Memedi, ish-ambasador në Romë.
Në fund të vitit 2025 u tërhoqën edhe Osvit Rosoklija nga Vjena dhe Slobodan Uzunov nga Nju Delhi. Ndërkohë, ambasadori në Brazil, Igor Popov, u emërua edhe ambasador jorezident në Uruguai.
Gjatë vitit 2025 u tërhoqën edhe Jakup Rexhepi nga Bosnjë-Hercegovina, Xhenk Sejfulla nga Suedia, Metodija Belevski nga Belgjika dhe Luksemburgu, Agneza Rusi Popovska nga Bullgaria, Emil Krsteski nga Praga, Zeqir Ramçiloviq nga Mali i Zi, Katerina Stavreska nga Britania e Madhe dhe Irlanda e Veriut, si dhe Pajo Aviroviq nga Misioni i Përhershëm pranë organizatave ndërkombëtare në Vjenë.
Në një periudhë relativisht të shkurtër, kështu pati ndryshime në mbi dhjetë poste ambasadorësh. Disa u larguan vetë pasi u thirrën për konsultime, ndërsa të tjerë u tërhoqën me dekret, kryesisht për shkak të moskalimit të procedurës në Komisionin parlamentar për Politikë të Jashtme.
Megjithatë, disa nga ambasadorët e emëruar gjatë qeverive të mëparshme vazhdojnë të jenë në detyrë. Mes tyre janë Nikola Tupançevski në Beograd, Goran Milevski në Lubjanë dhe Edmond Ademi në Madrid.
Në ndërkohë, qeveria aktuale ka emëruar dhe dërguar ambasadorë të rinj në disa vende. Mes tyre janë Igor Nikolov në Paris, Dragan Gjurçevski në Kroaci, Andrijana Cvetkoviq në Japoni dhe Orhan Murtazani në selinë e NATO-s në Bruksel.
