Paris, 07 tetor, Zhurnal.mk – Më shumë se 250 mijë njerëz protestuan dje në të gjithë Francën, në një valë protestash të nisura nga të rinjtë, të cilët kërkojnë kushte më të mira në shkolla dhe universitete.
Protestat janë shndërruar në një nga demonstratat më të mëdha, që Franca ka parë prej vitesh.
Ministria e Brendshme franceze tha se në protesta morën pjesë rreth 256 mijë persona, prej tyre 56 mijë në Paris.
Ndërsa sindikatat e arsimit thanë se numri i protestuesve në të gjithë vendin ishte rreth 450 mijë.
Presidenti francez, Emmanuel Macron zhvilloi dje në mbrëmje një mbledhje urgjente ku morën pjesë kryeministri Sebastien Lecornu, ministri i Brendshëm Laurent Nunez dhe ministri i Arsimit Edouard Geffray.
Macron, deri tani nuk kishte ndërhyrë publikisht, në mënyrën se si qeveria po menaxhonte protestat, të cilat nisën muajin e kaluar.
Në protestat e djeshme morën pjesë nxënës, studentë, mësues, prindër dhe sindikata.
Demonstrata u zhvilluan në Paris dhe në qytete të mëdha si Lioni, Lille, Marseja, Tuluzë, Bordo, Ren dhe Strasburg.
Sindikatat e mësuesve thanë se rreth 1,800 shkolla të mesme ishin bllokuar ose mbyllur përkohësisht, ndërsa rreth 90% e universiteteve ishin bllokuar.
Ministria e Arsimit tha se mësimi ishte ndërprerë plotësisht ose pjesërisht në 891 shkolla të mesme.
Policia është kritikuar gjithnjë e më shumë për përdorim të tepruar të forcës, veçanërisht për përdorimin e gazit lotsjellës.
Në Marsejë, një protestues mbante një pankartë ku shkruhej: “Përdorni gaz lotsjellës ndaj përdhunuesve, jo ndaj të miturve.”
Edhe disa politikanë kanë kritikuar mënyrën se si policia po vepron. Ndërkohë, një strukturë zyrtare që kontrollon policinë, po heton disa raste ku protestuesit janë plagosur nga efektivët.
Nga ana tjetër, edhe policia është sulmuar me fishekzjarre dhe objekte të tjera. Të paktën 43 policë u plagosën vetëm në protestat e djeshme.
Ministria e Brendshme tha se u arrestuan 488 persona. Që nga fillimi i protestave janë arrestuar gjithsej 5 060 persona, dhe sipas Ministrisë së Drejtësisë, 87% e tyre janë të mitur.
Ministri i Drejtësisë tha se dëmet ndaj shkollave dhe pronës publike gjatë protestave arrijnë në disa milionë euro.
Protestat nisën për shkak të problemeve të vjetra në sistemin arsimor.
Nxënësit ankohen se shumë orë mësimi anulohen sepse mungojnë mësuesit zëvendësues; shumë shkolla janë në gjendje të keqe dhe kanë nevojë për rikonstruksion; kushtet për të mësuar duhet të përmirësohen; në lagjet më të varfra, të rinjtë thonë se ndihen të trajtuar si qytetarë të dorës së dytë dhe se shqetësimet e tyre nuk po merren seriozisht.
Kryeministri Lecornu u ka kërkuar ministrive të bëjnë ndryshime konkrete në shkolla dhe të dëgjojnë kërkesat e nxënësve.
Qeveria ka propozuar gjithashtu që shkollat të diskutojnë problemet e nxënësve, në vend që të zhvillojnë mësimin normal.
Ministri i Arsimit ka hapur edhe një platformë online ku nxënësit mund të paraqesin kërkesat dhe shqetësimet e tyre.
Protestat kanë përfshirë një numër shumë të madh njerëzish dhe kanë kapur qeverinë franceze të papërgatitur, veçanërisht pasi zgjedhjet presidenciale janë vetëm shtatë muaj larg.
Qeveria po përballet gjithashtu me një borxh të lartë shtetëror dhe probleme financiare.
Ekziston frika se çmimet e larta të karburanteve dhe rritja e kostos së jetesës, mund të bëjnë që protestave t’u bashkohen edhe grupe të tjera të popullsisë.
Kjo mund të krijojë një protestë shumë më të gjerë, të ngjashme me lëvizjen e “Jelekëve të Verdhë”, e cila shkaktoi protesta të mëdha në Francë në vitin 2019.
