Shkup, 14 shkurt – Dje u zhvillua një takim i rëndësishëm me të rinjtë e Bashkimi Demokratik për Integrim, në kuadër të procesit të rikonfigurimit organizativ pas Kongresit të 20 dhjetorit 2025.
Në takim morën pjesë Sekretari Organizativ i BDI-së, z. Nebi Rexhepi, si dhe Koordinatorja e Grupit Parlamentar, znj. Rina Ajdari.
Në një atmosferë serioze dhe konstruktive, u diskutua për angazhimin e rinisë në periudhën kalimtare deri në konsolidimin e Forumit të ri Rinor, si dhe për qëndrimin e të rinjve lidhur me zhvillimet aktuale politike në vend dhe sfidat që prekin drejtpërdrejt brezin e ri.
U theksua se roli i rinisë është thelbësor dhe se organizimi i saj është pjesë e zbatimit të Statutit dhe garanci e fuqizimit të strukturës në terren.
Takimi përfundoi me konkluza të qarta, me gatishmëri për angazhim konkret dhe me vullnet për ta çuar përpara procesin e konsolidimit të forumit rinor në përputhje me parimet organizative të partisë.
Rinia nuk është spektatore e proceseve, ajo është pjesë aktive e tyre.
