Shkup, 6 qershor, Zhurnal.mk – Daut Memishi nga VLEN deklaroi se vendi ndodhet përballë një momenti historik, pasi pas më shumë se dy dekadash vonesë, përfaqësimi i drejtë dhe adekuat po merr formë ligjore.
Sipas tij, përfaqësimi i drejtë dhe adekuat është një parim kushtetues që buron nga Marrëveshja e Ohrit, konkretisht nga pika 4.2 e saj, dhe për këtë arsye ligji në fjalë nuk duhet parë si një akt i zakonshëm juridik, por si një hap i rëndësishëm drejt zbatimit dhe avancimit të Marrëveshjes së Ohrit.
“Jo më fjalë që i merr era dhe as premtime për të kaluar zgjedhjet, por ligj. Përfaqësimi i drejtë dhe adekuat është parim kushtetues që buron nga Marrëveshja e Ohrit. Ky është një hap historik përpara drejt zbatimit dhe avancimit të saj”, deklaroi Memishi.
Ai kritikoi partitë që kanë qenë pjesë e pushtetit në të kaluarën, duke thënë se kanë pasur mundësinë dhe mbështetjen e qytetarëve për ta miratuar këtë ligj, por sipas tij, ka munguar vullneti politik.
“Ky ligj është dashur të miratohej para më shumë se dy dekadave. Ata që sot bërtasin e kishin besimin e shqiptarëve dhe pushtetin për ta bërë këtë ligj. Në çdo zgjedhje premtonin, ndërsa në çdo mandat arsyetoheshin”, tha ai.
Memishi kujtoi gjithashtu deklaratat e mëhershme se Marrëveshja e Ohrit ishte realizuar plotësisht, duke pyetur se ku kishte mbetur Ligji për përfaqësim të drejtë dhe adekuat, të cilin e cilësoi si një nga shtyllat kryesore të marrëveshjes.
Sipas tij, avancimi i Marrëveshjes së Ohrit nuk bëhet me deklarata ceremoniale, por me shndërrimin e parimeve të saj në norma ligjore.
“Me këtë ligj, përfaqësimi i drejtë dhe adekuat bëhet obligim ligjor për të gjitha institucionet. Jo më improvizime dhe zgjidhje të përkohshme, por një sistem i bazuar në metodologji, të dhëna dhe përgjegjësi institucionale”, theksoi Memishi.
Ai shtoi se, ndonëse për 25 vjet askush nuk e ka sjellë këtë zgjidhje ligjore, VLEN po e realizon atë brenda 25 muajve, duke vlerësuar se për qytetarët shqiptarë ka më shumë rëndësi një ligj që garanton të drejtat e tyre sesa postet dhe funksionet politike.
