Shkup, 21 tetor, Zhurnal.mk – Ministria e energjisë, minierave dhe burimeve minerale zhvilloi një takim pune me përfaqësues të bankës gjermane për zhvillim KfW, ku u shqyrtuan mundësitë për vazhdimin dhe avancimin e bashkëpunimit në sektorin e energjetikës.
Në fokus të bisedimeve ishin mundësitë për përfshirjen e KfW-së në mbështetjen e projekteve dhe aktiviteteve të reja gjatë vitit të ardhshëm, si dhe shqyrtimi i projekteve aktuale, zbatimi i tyre dhe përparimi i deritanishëm.
Vëmendje e veçantë iu kushtua mundësive për sigurimin e asistencës teknike dhe mbështetjes nga ekspertët për nevojat e Ministrisë, me qëllim forcimin e kapaciteteve institucionale dhe përmirësimin e proceseve të planifikimit dhe realizimit të projekteve strategjike energjetike.
Ministria e energjisë mbetet e përkushtuar në zhvillimin e partneriteteve me institucionet financiare ndërkombëtare, të cilat kontribuojnë në modernizimin e sektorit të energjetikës, rritjen e sigurisë energjetike dhe përshpejtimin e tranzicionit energjetik.
Bashkëpunimi me KfW-në përbën një bazë të rëndësishme për shqyrtimin e mundësive të reja për investime, shkëmbimin e ekspertizës dhe mbështetjen e projekteve me rëndësi strategjike për sistemin energjetik të vendit.
