Shkup, 19 qershor, Zhurnal.mk – Komisioni Parlamentar për Financim dhe Buxhet, në kuadër të seancës së sotme, do të zhvillojë debat publik mbi Projektligjin për lojërat e fatit dhe lojërat argëtuese.
Qëllimet e miratimit dhe zbatimit të këtij ligji, të shprehura përmes nevojës për parandalimin e ekonomisë gri në fushën e lojërave të fatit, janë sigurimi i besimit dhe sigurisë tek pjesëmarrësit në lojërat e fatit dhe mbrojtja e tyre (veçanërisht e popullatës së re), mbrojtja e organizatorëve sidomos nga konkurrenca jolojale, legalizimi dhe kontrolli i flukseve financiare në këtë fushë si dhe realizimi i interesit të shtetit.
Ligji i propozuar bazohet mbi: parimin e ekskluzivitetit në organizimin e lojërave të fatit dhe parimin e licencimit të së drejtës për organizimin e lojërave të fatit dhe lojërave argëtuese; parimin e ekonomicitetit dhe efikasitetit të procedurës administrative për dhënien, heqjen, ndërprerjen dhe anulimin e licencave dhe lejeve të përcaktuara me këtë ligj, si dhe në raste të tjera të veprimit administrativ sipas këtij ligji; dhe parimin e sigurisë juridike dhe mbrojtjes së organizatorëve dhe pjesëmarrësve në lojërat e fatit dhe lojërat argëtuese.
Me Projektligjin bëhet përcaktimi i saktë i lojërave të fatit dhe lojërave argëtuese, klasifikimi i lojërave të fatit, përcaktimi i specifikave të procedurës administrative për dhënien dhe heqjen e së drejtës për organizimin e lojërave të fatit dhe lojërave argëtuese, kontrolli mbi organizimin, dispozitat kundërvajtëse, si dhe përcaktimi i destinimit të të ardhurave të realizuara nga organizimi i lojërave të fatit dhe lojërave argëtuese.
