Shkup, 8 shtator, Zhurnal.mk – Aeroporti i Ohrit “Shën Apostol Pali” mori pamje të re dhe moderne, me çka bëhet një nga simbolet e rajonit të Ohrit, tha zëvendëskryeministri dhe ministër i transportit dhe lidhjeve, Aleksandar Nikolloski, me rastin e Ditës së Pavarësisë.
Nikolloski theksoi se për vetëm dy vite është realizuar rikonstruktimi i aeroportit, i pari pas 56 vitesh, me të cilin, siç tha, krijohen kushte për tërheqjen e një numri më të madh turistësh dhe kompanish ajrore të reja.
“Për vetëm dy vite arritëm që aeroporti ‘Shën Apostol Pali’ në Ohër të marrë pamje të re bashkëkohore, mishërim i rajonit të Ohrit”, theksoi Nikolloski.
Sipas tij, rezultatet tashmë janë të dukshme përmes rritjes së numrit të pasagjerëve. Që nga fillimi i vitit e deri sot, përmes aeroportit të Ohrit kanë kaluar më shumë se 240 mijë pasagjerë, shifër e cila, siç theksoi, është mbi pritjet. Paralelisht me rikonstruktimin e aeroportit, realizohen edhe aktivitete infrastrukturore për përmirësimin e qasjes deri te objekti, me qëllim që udhëtimi deri dhe nga aeroporti të jetë më i lehtë dhe më i shpejtë.
Nikolloski theksoi se investimet infrastrukturore duhet të kontribuojnë për përmbylljen e tërësisë në zhvillimin e rajonit të Ohrit.
“Gëzuar Ditën e Pavarësisë! Po e ndërtojmë Maqedoninë!”, porositi zëvendëskryeministri Nikolloski.
