Shkup, 25 prill Zhurnal.mk – Skena politike në vend po hyn në një fazë të re tensioni, pas paralajmërimeve të kreut të LSDM-së, Venko Filipçe, se partia mund të tërhiqet nga grupi i punës për Kodin Zgjedhor nëse shfuqizohet qeveria teknike e Përzhinës.
Filipçe ka vlerësuar se heqja e kësaj qeverie përbën rrezik për procesin demokratik dhe mund të hapë rrugë për manipulime zgjedhore.
“Pse insistohet të hiqet qeveria e Përzhinës nëse ajo është garanci për zgjedhje të drejta? Sepse synohet kontroll i plotë i sistemit”, deklaroi ai.
Nga ana tjetër, kryeministri Hristijan Mickoski nuk i dha peshë këtij paralajmërimi, duke theksuar se grupi i punës do të vazhdojë funksionimin edhe pa pjesëmarrjen e LSDM-së.
Ndërkohë, nga VMRO-DPMNE kanë kritikuar qëndrimet e opozitës, duke akuzuar LSDM-në se po bllokon reformat dhe nuk kontribuon në zhvillimin e vendit. Deputeti Brane Petrushevski theksoi se tërheqja nga retorika e ashpër është një hap pozitiv, por shtoi se opozita nuk po ofron zgjidhje konkrete.
Analistët politikë vlerësojnë se nevoja për qeverinë teknike mund të jetë tejkaluar, por paralajmërojnë se çdo ndryshim duhet të shoqërohet me mekanizma të fortë për të parandaluar abuzimet zgjedhore.
Ndryshimet në Ligjin për Qeverinë, që parashikojnë heqjen e qeverisë së Përzhinës, tashmë kanë kaluar në komision dhe pritet të dalin për votim në Kuvend gjatë kësaj jave, duke shtuar pasigurinë për zhvillimet e ardhshme politike.
