Tiranë, 24 korrik, Zhurnal.mk – Drejtoria e Përgjithshme e Arkivave dhe Agjencia Kombëtare e Shoqërisë së Informacionit prezantuan sistemin “eArkiva”, një platformë e zhvilluar nga AKSHI nën mbikëqyrjen e DPA-së, për menaxhimin dhe digjitalizimin e dokumentacionit zyrtar.
Përdoruesit e parë të këtij sistemi do të jenë ministritë dhe institucione të tjera shtetërore, ndërsa më tej, eArkiva do të funksionojë në gjithë administratën shtetërore. Ky sistem zhvillohet në kuadër të procesit të digjitalizimit të arkivave publike.
eArkiva u prezantua nga drejtori i përgjithshëm i DPA-së, Auron Rrokaj, dhe zëvendësdrejtoresha e përgjithshme e AKSHI-t, Romina Kostani.
Rrokaj nënvizoi ndryshimet epokale në dhjetëvjeçarin e fundit, falë përkujdesjes së qeverisë shqiptare për punën me dokumentet, duke sjellë në rastin e eArkiva shembullin konkret të programit të Qeverisë, si një hap strategjik drejt digjitalizimit, shërbimeve elektronike dhe realizimit të vizionit të Shqipërisë pa letra.
Rrokaj e cilësoi sistemin eArkiva një produkt shumë cilësor dhe modern. Gjithashtu, bëri të ditur se projekti pilot do të nisë së shpejti në disa ministri, ndërsa nga janari 2027 procesi i digjitalizimit do të shtrihet në të gjithë administratën publike.
Në fjalën e saj, Romina Kostani, theksoi se digjitalizimi i arkivave nuk është thjesht kalimi i dokumenteve në format elektronik, por një transformim i mënyrës se si shteti administron informacionin. Ajo nënvizoi se, falë Inteligjencës Artificiale, dokumentet bëhen të kërkueshme, të analizueshme dhe të përdorshme për vendimmarrje më të shpejtë dhe më efikase.
eArkiva është konceptuar si një zgjidhje e centralizuar, ajo është një platformë inteligjente për menaxhimin elektronik të dokumenteve, që mbulon të gjithë ciklin e tyre të jetës – nga skanimi dhe verifikimi deri te arkivimi afatgjatë në formatin PDF/A.
Me integrimin e OCR dhe Inteligjencës Artificiale, sistemi automatizon përpunimin e dokumenteve, duke reduktuar ndjeshëm kohën, kostot dhe proceset manuale të administrimit, një nga objektivat kryesore të Qeverisë shqiptare në modernizimin e administratës publike dhe të shërbimeve të saj ndaj qytetarëve.
