Palermo, 29 gusht, Zhurnal.mk – Komuna e Pianës së Arbëreshëve në Sicili i ka ndarë sot titullin “Qytetar Nderi” profesor Vebi Bexhetit, në shenjë vlerësimi për kontributin e tij dhe angazhimin në forcimin e lidhjeve institucionale e kulturore me komunitetin arbëresh.
Ceremonia zyrtare dhe dorëzimi i titullit u zhvilluan sot në kuadër të aktiviteteve të Festës së Fondacionit, të cilat mbahen nga 24 deri më 30 gusht 2026.
Kryetari i Komunës së Pianës së Arbëreshëve, Rosario Petta, theksoi rëndësinë e këtij vlerësimi për promovimin e unitetit dhe pasurisë kulturore të komunitetit arbëresh.
Sipas tij, profesor Bexheti përfaqëson një figurë të spikatur për kontributin e tij kombëtar dhe për angazhimin në forcimin e lidhjeve me vlerat dhe trashëgiminë arbërore.
Ndarja e titullit “Qytetar Nderi” për profesor Vebi Bexhetin vjen si një tjetër dëshmi e lidhjeve të qëndrueshme ndërmjet shqiptarëve dhe komuniteteve arbëreshe në Itali.
Ngjarja rikthen në vëmendje edhe rëndësinë e ruajtjes dhe promovimit të identitetit, gjuhës dhe traditave shqiptare, si dhe përcjelljen e tyre te brezat e rinj.
Ky vlerësim nga Komuna e Pianës së Arbëreshëve shënon një moment të veçantë në bashkëpunimin kulturor dhe institucional ndërmjet komuniteteve shqiptare dhe arbëreshe.
