Tiranë, 9 prill Zhurnal.mk – Shëtitorja “Taulantia” në Durrës shumë shpejt do të ketë një pamje të re.
Kryeministri Edi Rama, i shoqëruar nga kryetarja e bashkisë Durrës, Emiriana Sako inspektoi sot kantierin e shëtitores “Taulantia” ku puna po vijon me ritme të larta.
Kryeministri bëri të ditur se brenda muajit qershor, kjo shëtitore e rilindur do të jetë gati për të mikpritur turistët e shumtë.
Në këtë shëtitore ka nisur tashmë edhe montimi i strukturave hijezuese të konceptuara nga studioja prestigjioze e arkitekturës europiane, spanjollja “Bofill Taller de Arquitectura”.
Ricardo Bofill është një arkitekt spanjoll i njohur për dizajnet e tij të guximshme dhe inovative që ndërthurin stilet moderne dhe postmoderne.
Studioja e tij arkitekturore ka përfunduar projekte në mbarë botën, me një stil që karakterizohet nga forma gjeometrike, kënde dramatike dhe përdorimi i lëndëve të para si betoni dhe çeliku.
Projekti i zbatuar në shëtitoren “Taulantia” sjell pikërisht këtë stil, ndërkohë që në tërësi investimi përfshin krijimin e hapësirave të gjelbra, sistemin e ri të ndriçimit, këndet sportive, si dhe hapësira rekreative.
Shëtitorja në vijën bregdetare të Durrësit një nga zonat turistike më të frekuentuara gjatë verës nga pushues vendas e të huaj, ka po ashtu korsi të posaçme për këmbësorët dhe biçikletat.
Durrësi është prej qyteteve destinacione turistike, që vitet e fundit ka njohur rritje të numrit të vizitorëve të huaj, ndërsa të shumta janë kroçerat që sjellin turistë nga vende të ndryshme të botës.
