Tiranë, 05 tetor, Zhurnal.mk – Kryetari i grupit parlamentar në Partinë Demokratike, Gazment Bardhi, u kërkoi sot deputetëve të Partisë Socialiste që të dëgjojnë zërin e qytetarëve në lidhje me reformën territoriale.
Sipas tij, deputetët socialistë në vend që të dëgjojnë zërin e qytetarëve në Kuvend, rrezikojnë të kthehen në zëdhënës të vendimeve politike të kryeministrit Edi Rama.
“Divjaka, Patosi, Rrogozhina, Maliqi, Dimali, Cërriku, Përrenjasi, Belshi, Klosi, Poliçani, Memaliaj, Fushë-Arrëzi, Këlcyra dhe Libohova janë në tryezën e kësaj reforme për t’u shkrirë. Por nga deputetët e PS-së që kanë marrë mandatin për të përfaqësuar qytetarët e këtyre bashkive, heshtja është ajo që bie më shumë në sy. Ku është zëri i tyre? Ku është përgjegjësia ndaj qytetarëve që i kanë votuar? Ku është detyrimi për të mbrojtur interesin e komuniteteve që përfaqësojnë?”, tha ai.
Bardhi theksoi se “nëse një deputet hesht kur vendoset për fatin e bashkisë që ai ose ajo pretendon se përfaqëson, atëherë qytetarët kanë të drejtë të pyesin: kë përfaqëson realisht ky deputet?”.
“Mandati parlamentar nuk është pronë e partisë, është mandat i qytetarëve”, theksoi ai.
Ai shtoi se qytetarët meritojnë deputetë që flasin, kundërshtojnë dhe mbajnë përgjegjësi, jo deputetë që heshtin kur vendimet prekin drejtpërdrejt komunitetet që i kanë zgjedhur.
“Kjo është çështje përfaqësimi. Kjo është çështje përgjegjësie. Dhe përballë qytetarëve, heshtja nuk mund të fshihet pas disiplinës partiake”, tha Bardhi.
