Shkup, 21 gusht, Zhurnal.mk – Ministri i Sportit, Borko Ristovski, mori pjesë në finalen ndërkombëtare të Lojërave Sportive për të Rinj “Plazma”, që u mbajt në Split, Kroaci.
Në fjalimin e tij, Ristovski përshëndeti pjesëmarrësit dhe organizatorët e manifestimit më të madh sportiv‑amator për fëmijë dhe të rinj në Evropë, i cili këtë vit shënon sezonin jubilar të 30‑të. Për herë të parë, me mbështetjen e Ministrisë së Sportit dhe të Qeverisë, Maqedonia u bë pjesë e këtyre lojërave.
„Jam krenar që nga ky vit edhe Maqedonia është pjesë e familjes së madhe të Lojërave Sportive për të Rinj ‘Plazma’. Jam edhe më krenar për sportistët tanë të rinj që në finalen e tyre të parë ndërkombëtare treguan talent, shpirt sportiv dhe dëshirë për garë. Medaljet janë të rëndësishme dhe i përgëzoj për çdo sukses të arritur. Por vlera e vërtetë e këtyre Lojërave është shumë më e madhe se rezultati. Ato u mundësojnë fëmijëve të merren me sport, të shoqërohen dhe përmes lojës e garës të mësojnë çfarë do të thotë shpirt ekipor, tolerancë, respekt dhe fair‑play. Besoj në idenë që bartin këto Lojëra – sporti nuk duhet të jetë privilegj, por e drejtë dhe mundësi për çdo fëmijë!“ – theksoi ministri Borko Ristovski.
Maqedonia këtë vit për herë të parë mori pjesë në Lojërat, së bashku me Kroacinë, Bosnjë e Hercegovinën, Serbinë dhe Slloveninë. Sportistët e rinj maqedonas fituan shtatë medalje – tre të argjendta dhe katër të bronzta.
Në Split, medaljen e parë për Maqedoninë e fitoi Naum Naskovski nga Kumanova me vendin e tretë në garën 60 metra, ndërsa ekipi “Rolling” nga Strumica fitoi vendin e tretë në basket 3×3. Në shah, medalje të argjendta fituan Ilijana Veleva nga Sveti Nikole dhe David Atanasovski nga Gazi Baba. Në ping‑pong, Jovan Parmacki nga Berova fitoi argjend, ndërsa medalje bronzi fituan Martin Ristevski nga Prilepi dhe Bojana Jovevska nga Pehçeva. Tomi Jakimovski mori çmimin për fair‑play në turneun e tenisit.
Në finalen ndërkombëtare morën pjesë 1.224 garues nga gjashtë vende. Risia ishte pjesëmarrja e 204 fëmijëve nga Ukraina, ndërsa mbështetje të veçantë i dha edhe boksieri i njohur Oleksandr Usyk, së bashku me shumë emra të njohur dhe legjenda nga futbolli, basketbolli, tenisi, hendbolli dhe sporte të tjera.
Lojërat Sportive për të Rinj “Plazma” edhe në sezonin e 30‑të e konfirmuan misionin e tyre bazë – sport falas për çdo fëmijë dhe krijimin e mundësive që më të rinjtë përmes sportit të zhvillojnë zakone të shëndetshme dhe të përvetësojnë vlerat e vërteta: shpirt ekipor, tolerancë, fair‑play dhe inkluzion.
Në tre dekadat e fundit, në Lojërat kanë marrë pjesë mbi 3.869.000 fëmijë dhe të rinj. Me pjesëmarrjen në këto Lojëra, Maqedonia hap një mundësi të re që më të rinjtë të jenë pjesë e një familjeje të madhe sportive ndërkombëtare, të garojnë, të krijojnë miqësi të reja dhe përmes sportit të ndërtojnë vlera që zgjasin shumë më tepër se çdo medalje e fituar.
