Strugë, 14 qershor, Zhurnal.mk – Ditën e diel ka ndërruar jetë profesori i njohur universitar Dr. Murat Murati, një emër i respektuar në fushën e shkencave biologjike dhe botanikës.
Lajmin për vdekjen e tij e kanë bërë të ditur familjarët, të cilët njoftuan se lamtumira e fundit do t’i jepet të hënën në qytetin e Strugës.
Dr. Murat Murati pas përfundimit të shkollës fillore vazhdoi shkollimin në Normalen e Shkupit. Fillimisht punoi si mësues në Zajaz, ndërsa më pas vijoi studimet në Universitetin “Shën Kirili dhe Metodi” në Shkup, ku u diplomua me sukses në drejtimin e Biologjisë. Pas diplomimit u punësua si profesor në Normalen e Shkupit.
Karrierën akademike e zhvilloi më tej në Universitetin e Zagrebit, ku përfundoi me sukses studimet pasuniversitare, duke marrë gradën e magjistrit dhe më vonë doktoraturën në shkencat biologjike, në degën e botanikës. Ai u bë një ndër lihenologët më eminentë në Ballkan dhe më gjerë.
Gjatë karrierës së tij, Dr. Murati shërbeu si profesor i rregullt në Shkollën e Lartë Pedagogjike në Gjakovë dhe ishte ndër profesorët e parë të Universitetit të Tetovës, duke dhënë një kontribut të çmuar në arsimin e lartë shqiptar.
Me ndarjen e tij nga jeta, komuniteti akademik humb një profesor, studiues dhe pedagog të shquar, i cili la gjurmë të rëndësishme në fushën e biologjisë dhe botanikës.
Shuhet nga jeta prof. Dr. Murat Murati
689
