Shkup, 15 qershor, Zhurnal.mk – Presidentja e Maqedonisë së Veriut, Gordana Siljanovska-Davkova, vlerësoi se iniciativat për kufizimin e përdorimit të vetos në procesin e zgjerimit të Bashkimit Evropian përbëjnë një zhvillim pozitiv, por theksoi se është ende herët për të nxjerrë përfundime derisa të publikohen dokumentet zyrtare, përcjell Zhurnal.mk.
Duke komentuar debatet e fundit lidhur me reformat në procesin e zgjerimit të BE-së, Siljanovska-Davkova tha se vendet e Ballkanit Perëndimor, përfshirë Maqedoninë e Veriut, kanë një përparësi kohore në krahasim me Ukrainën dhe Moldavinë, pasi prej vitesh janë pjesë e proceseve integruese evropiane.
Ajo theksoi se kufizimi i mundësisë së bllokimit të procesit të zgjerimit përmes vetos mund të kontribuojë në rritjen e besueshmërisë së politikës së zgjerimit të Bashkimit Evropian.
Presidentja vlerësoi se pengesat me të cilat përballet Maqedonia e Veriut në rrugën e saj drejt anëtarësimit në BE janë joracionale dhe nuk lidhen drejtpërdrejt me përmbushjen e standardeve evropiane.
Sipas saj, fokusi duhet të rikthehet te kriteret e Kopenhagës, të cilat përbëjnë bazën e procesit të integrimit evropian dhe përfshijnë sundimin e ligjit, funksionimin e institucioneve demokratike, respektimin e të drejtave të njeriut dhe zhvillimin e ekonomisë së tregut.
Siljanovska-Davkova theksoi se përparimi i vendeve aspirante duhet të vlerësohet mbi bazën e reformave dhe përmbushjes së kritereve të përcaktuara nga Bashkimi Evropian, e jo përmes pengesave politike që mund të ngadalësojnë procesin e zgjerimit.
