Shkup, 19 gusht, Zhurnal.mk – Ministri i Vetëqeverisjes Lokale, Ivan Stoilkovik, sot zhvilloi një takim pune me N.E. Martin Pamer, ambasador i Republikës së Austrisë në RMV.
Në takim u konfirmua bashkëpunimi tradicionalisht i mirë dhe miqësor mes dy vendeve, si dhe interesi i përbashkët për avancimin e tij të mëtejshëm. U shkëmbyen mendime edhe për temat dhe prioritetet me interes për Austrinë në vend, me theks të veçantë në fushat me rëndësi për zhvillimin lokal dhe forcimin e kapaciteteve të vetëqeverisjes lokale.
Në kuadër të bisedës u prezantua projekti për zhvillimin e shërbimit zjarrfikës, ku u nënvizua rëndësia e mbështetjes për zbatimin e tij, veçanërisht në drejtim të përmirësimit të kapaciteteve të shërbimeve zjarrfikëse në kuadër të vetëqeverisjes lokale dhe shkëmbimit të përvojave e praktikave të mira.
Ministri Stoilkovik theksoi rëndësinë e mbështetjes që Austria vazhdimisht e jep për perspektivën evropiane të RMV-së dhe të vendeve të Ballkanit Perëndimor, duke vlerësuar se shkëmbimi i përvojave dhe praktikave të mira mund të kontribuojë më tej në përmirësimin e punës së vetëqeverisjes lokale.
Në takim u shpreh gatishmëria për vazhdimin e dialogut të hapur dhe për identifikimin e mundësive të reja për bashkëpunim konkret në interes të qytetarëve dhe komuniteteve lokale.
