Shkup, 20 janar – Në emisionin e mbrëmshëm “Direktno” debatojnë Sllobodan Trendafilov nga LSM (SSM), Toni Jarevski nga VMRO-DPMNE dhe Mile Boshkov nga Konfederata e Biznesit.
Trendafilov në fillim theksoi se për javën e ardhshme është paralajmëruar një Grevë e Përgjithshme, për shkak se Qeveria ka mbetur e heshtur lidhur me rritjen e pagës minimale, e cila është një nga më të ulëtat në Ballkan dhe në Evropë.
“As Qeveria dhe as punëdhënësit nuk u morën vesh deri në fund të vitit të kaluar dhe nuk e shohim vullnetin për përmirësimin e standardit jetësor. Për fat të keq, në vitin 2025 ne si punëtorë u lamë në mëshirë të fatit, që secili të gjendet si di dhe si mundet. Rritja e shpenzimeve të jetesës, përkeqësimi i standardit jetësor dhe pagat e ulëta, u përpoqëm t’i trajtojmë në mënyrë të argumentuar në mbledhjen e fundit të Këshillit Ekonomiko-Social, përmes një analize gjithëpërfshirëse që përgatitëm, me qëllim që t’i eliminojmë të gjitha justifikimet që ata i kishin gjatë gjithë vitit, por nuk donin të na dëgjonin dhe nuk donin të arrinin marrëveshje,” shpjegoi Trendafilov.
Ai theksoi se “Qeveria, në vend që t’i heqë syzet rozë, po udhëheq një shtet që është më i varfri në Evropë dhe punëtorë që janë më të varfrit. Ata, njëkohësisht, do të jenë fajtorët për grevën e parë të përgjithshme që do të ndodhë këtë vit, sepse refuzojnë të ulen dhe të bisedojnë me sindikatat.”
