Me ftesë të Kryeministrit të Kinës Li Qiang, në datat 25 -26 shkurt Kancelari i Gjermanisë Merz zhvilloi vizitën e tij të parë zyrtare në Kinë. Gjatë vizitës ai u shoqërua nga një delegacion i lartë prej 30 përfaqësuesish ekonomikë të Gjermanisë.
Në Pekin, Merz zhvilloi takime me Kryetarin e Shtetit të Kinës Xi Jinping, si dhe Kryeministri e Kinës Li Qiang. Liderët e dy palëve shkëmbyen mendime mbi marrëdhëniet Kinë-Gjermani, çështjet ndërkombëtare e rajonale, si dhe politikat ekonomike.
Gjermania ritheksoi zbatimin e politikës së një Kine.
Të dyja palët theksuan se bashkëpunimi ekonomik dhe tregtar është pjesë e rëndësishme e marrëdhënieve dypalëshe dhe shprehën gatishmërinë e tyre për të thelluar bashkëpunimin me përfitim të ndërsjellë. Ata theksuan rëndësinë e dialogut të hapur, konkurrencës së drejtë dhe aksesit të ndërsjellë në treg. Palët janë të gatshme t’i adresojnë siç duhet shqetësimet e njëra-tjetrës përmes dialogut të sinqertë dhe të hapur, për të siguruar një marrëdhënie ekonomike dhe tregtare afatgjatë, të ekuilibruar, të besueshme dhe të qëndrueshme.
Të dyja palët besojnë se parimet e Kartës së OKB-së dhe të së drejtës ndërkombëtare janë themeli i bashkëpunimit ndërkombëtar. Kina dhe Gjermania do të vazhdojnë të bëjnë përpjekje në këtë drejtim, të ruajnë dialogun mbi çështjet ndërkombëtare, të mbështesin me vendosmëri statusin e Kombeve të Bashkuara dhe t’i përmbahen multilateralizmit dhe tregtisë së lirë.
Të dyja palët inkurajuan dhe mbështetën forcimin e shkëmbimeve njerëzore midis dy vendeve dhe ranë dakord të forcojnë më tej bashkëpunimin kulturor e sportiv, si dhe të rrisin mirëkuptimin e ndërsjellë përmes programeve të shkëmbimit dhe vizitave të ndërsjella midis figurave kulturore, organizatave sportive dhe të rinjve.
Ato diskutuan gjithashtu çështjen e Ukrainës dhe mbështetën përpjekjet për të arritur një armëpushim dhe paqe të qëndrueshme bazuar në Kartën dhe parimet e OKB-së.
