Izraeli dhe Shtetet e Bashkuara nisën një sulm të koordinuar ndaj Iranit, duke synuar takimin e Udhëheqësit Suprem Ajatollah Ali Khamenei me ndihmësit e tij më të ngushtë, në të cilin Uashingtoni dhe Tel Avivi thanë se Khamenei u vra. Operacioni, i planifikuar për të përfituar nga mbledhja e udhëheqjes iraniane, e thelloi më tej konfliktin në Lindjen e Mesme dhe shkaktoi hakmarrje iraniane me sulme me raketa.
Izraeli dhe SHBA-të e caktuan sulmin ndaj Iranit për të shtunën, në mënyrë që të përkonte me një samit midis Ajatollah Ali Khameneit dhe ndihmësve të tij, sipas dy burimeve amerikane të njohura me operacionin.Izraeli njoftoi se përveç ajatollahut, u vranë edhe ish-Sekretari i Përgjithshëm i Këshillit të Sigurisë Kombëtare Ali Shamkhani dhe komandanti i Trupave të Gardës Revolucionare Islamike, Mohammad Pakpour.
Dy burime iraniane i thanë Reuters se të shtunën, pak para se të fillonte sulmi, Khamenei thirri një takim në një vend të sigurt në të cilin ishin të pranishëm Shamkhani dhe sekretari aktual i Këshillit të Sigurisë Kombëtare, Ali Larijani.
Udhëheqësi suprem i Iranit u vra pasi shërbimet e inteligjencës zbuluan lëvizjet e tij, shkroi Presidenti i SHBA-së Donald Trump në platformën e tij Truth Social.
“Ai nuk mund të bënte asgjë kundër inteligjencës sonë dhe sistemeve shumë të sofistikuara të mbikëqyrjes. Ne punuam ngushtë me Izraelin, as ai dhe as udhëheqësit e tjerë që u vranë me të nuk mund të bënin asgjë”, tha Trump.
Sulmet ushtarake të SHBA-së dhe Izraelit kundër Iranit e shtynë Lindjen e Mesme në konflikte të reja, ndërsa Irani u kundërpërgjigj me raketa jo vetëm kundër Izraelit, por edhe kundër vendeve arabe të Gjirit Persik. Dy burime amerikane dhe një zyrtar, i cili dëshironte të mbetej anonim, thanë se konfirmimi i takimit midis ajatollahut dhe ndihmësve të tij ishte sinjali për fillimin e sulmit.
Sulmi kishte për qëllim të godiste fillimisht Khamenein për të arritur elementin e surprizës, shtoi ai, por kishte shqetësime se udhëheqësi suprem iranian mund të shpëtonte nëse i jepej mundësia.
Një burim amerikan tha se takimi i lartpërmendur pritej të mbahej të shtunën në mbrëmje në Teheran, por inteligjenca izraelite zbuloi se data ishte të shtunën në mëngjes, që do të thoshte shtyrja e fillimit të sulmit izraelito-amerikan.
Vendndodhja e takimit nuk u bë menjëherë e ditur. Kompleksi i Khameneit në Teheran u sulmua në fillim të operacionit dhe imazhet satelitore të shqyrtuara nga Reuters konfirmuan se ishte shkatërruar.
Edhe para sulmit, Agjencia Qendrore e Inteligjencës e SHBA-së vlerësoi se në rast të vdekjes së tij, Ajatollah mund të zëvendësohej nga përfaqësues të vijës së ashpër nga Trupat e Gardës Revolucionare Islamike.
