Shkup, 2 Prill, Zhurnal.mk – Qeveria e Shqipërisë thotë se projekti i trasesë së paraparë i Korridorit 8 në territorin shqiptar do të vazhdojë deri në Qafë Thanë për në kufirin me Maqedoninë e Veriut, raporton TV21.
Televizioni thotë se sipas një përgjegje nga Ministria e Infrastrukturës dhe Energjisë e Shqipërisë po punohet edhe për një kalim të ri kufitar midis të dy vendeve, ndërkohë që po punohet në vazhdim të autostradës deri në Qafë Thanë me Maqedoninë e Veriut.
“Punimet e autostradës së Korridorit 8 zhvillohen në dy segmente njëkohësisht Rrogozhinë-Elbasan dhe Elbasan-Qafë Thanë. Nga Qeveria e Maqedonisë së Veriut është kërkuar që të projektohet një trase e re nga ura e Bushtricës përmes një tuneli drejtë Ladorishtes dhe të hapet një vendkalimi i ri kufitarë, për shkurtim të kohës dhe për të evituar maloret që janë më të kushtueshme për ndërtim dhe mirëmbajtje,” citon TV21 një përgjegje të kësaj ministrie.
“Por, Qeveria e Shqipërisë do të vazhdojë edhe segmentin e mëparshëm drejt Qafë Thanës me Autostradë, për të cilat po zhvillohen punimet edhe në zonën e mbrojtur nga UNESCO”, thuhet në përgjegje të ministrisë së Shqipërisë, shkruan TV21.
Deklarimet e ministrisë në Shqipëri, sikur heqin dilemat e krijuara nga opozita në Maqedoni të Veriut, me pretendimet se në Maqedoni të Veriut qeveria po planifikon që të ndërpres punimet në korridor për në kufirin me Shqipërinë.
Detajet e vendimeve për trasen alternativë eventuale të segmentit nga afërsia e Liqenit të Ohrit, si zonë e mbrojtur nga UNESCO, e deri në kufirin me Shqipërinë sipas Kryeministrit Hristijan Mickoski, do të mësohen në Qershor, pas konsultimeve me UNESCO-n.
