Gjevgjeli, 3 maj Zhurnal.mk – Fundjava e zgjatur po i afrohet fundit, ndërsa që nga orët e pasdites kanë nisur pritjet e gjata në pikën kufitare Evzoni, në Greqinë fqinje.
Sipas dëshmive të qytetarëve në rrjetet sociale, kaosi ka filluar që rreth orës 14:00 me orën greke. Në këtë pikë kufitare janë regjistruar pritje disaorëshe, ku udhëtarët presin rreth tre orë për të dalë nga Greqia dhe për të hyrë në Maqedoninë e Veriut përmes Bogorodica.
Kolonat e automjeteve shtrihen për kilometra të tërë. Përveç fluksit të shtuar të udhëtarëve, një nga arsyet kryesore për vonesat është edhe zbatimi i sistemit të ri evropian të hyrje-daljeve, Entry/Exit System, i cili ka ngadalësuar ndjeshëm procedurat kufitare.
Përveç Evzonit/Bogorodicës, pritje janë regjistruar edhe në pikën kufitare Dojran, ku qytetarët presin rreth një orë. Krahas udhëtarëve nga Maqedonia e Veriut, edhe këtë herë numër i madh turistësh janë nga Serbia, si zakonisht gjatë kësaj periudhe.
