Ankara, 24 maj Zhurnal.mk – Policia turke bastisi zyrat e partisë kryesore opozitare të vendit, duke hedhur gaz lotsjellës dhe duke qëlluar me plumba gome ndaj mbështetësve dhe zyrtarëve të partisë që ishin mbyllur brenda për tre ditë.
Ky ishte një fund i dhunshëm i një përplasjeje midis anëtarëve të Partisë Republikane Popullore dhe një ekipi udhëheqës të emëruar nga një gjykatë apeli.
Mbështetësit fillimisht u përpoqën t’i rezistonin policisë duke i spërkatur me fikse zjarri, por u ndaluan shpejt. Dyert, mobiliet dhe dritaret e katit përdhes u shkatërruan.
Midis atyre që ishin brenda ndërtesës ishte Ozgur Ozel, i zgjedhur kryetar i partisë në nëntor 2023, por i shkarkuar nga vendimi i gjykatës së apelit.
Duke lënë ndërtesën e selisë nën brohoritjet dhe duartrokitjet e mbështetësve jashtë, Ozel u tha gazetarëve se u largua për t’u rikthyer.
Tensioni ishte rritur që nga e enjtja, kur një gjykatë apeli anuloi zgjedhjen e Ozel si kryetar i Partisë Republikane Popullore, duke e pezulluar atë dhe anëtarët e bordit ekzekutiv të partisë.
Vendimi i gjykatës tha se Ozel duhet të zëvendësohet nga Kemal Kilicdaroglu, paraardhësi i tij, i cili e udhëhoqi partinë për 13 vjet, por nuk fitoi kurrë zgjedhje kombëtare.
Ndërkohë, Ozel, në zgjedhjen e tij të parë dhe të vetme si kryetar i partisë, i dha një goditje vendimtare Partisë për Drejtësi dhe Zhvillim të Erdoganit në zgjedhjet komunale të vitit 2024.
Opozita thotë se vendimi ishte i motivuar politikisht për të dobësuar partinë, ndërsa ajo përballet me valë çështjesh ligjore që kanë në shënjestër anëtarët dhe zyrtarët e saj të zgjedhur.
