Gjevgjeli, 28 maj Zhurnal.mk – Kolona të gjata automjetesh janë regjistruar sot në pikën kufitare “Bogorodicë” me Greqinë, ku shumë qytetarë që kanë vendosur ta kalojnë fundjavën e zgjatur në shtetin fqinj po përballen me pritje të gjata.
Qytetarë që ndodhen në kufi kanë dërguar fotografi për Telma, duke bërë të ditur se kolona nuk ka lëvizur për më shumë se 40 minuta, ndërsa automjete ka në të gjitha tetë korsitë e kalimit kufitar.
Sipas informacioneve jozyrtare që u janë dhënë udhëtarëve, shkak për vonesat është rënia e sistemit EES (Entry-Exit System), i cili përdoret për kontrollin e hyrje-daljeve në vendet e Bashkimit Evropian.
Pritjet në kufirin me Greqinë janë zgjatur veçanërisht pas vendosjes së rregullave të reja evropiane për hyrje dhe dalje.
Ministri grek për Mbrojtjen e Qytetarëve, Mihalis Hrisohoidis, deklaroi sot se zbatimi i këtij sistemi do të vazhdojë pavarësisht ankesave që kanë ardhur nga vende të tjera, përfshirë Maqedoninë e Veriut dhe Serbinë.
“E di që ka ankesa. Kam marrë ankesa edhe nga kolegët e mi nga Maqedonia e Veriut dhe Serbia. Bëhet fjalë për një çështje me dy aspekte. I pari lidhet me mënyrën e re të hyrjes në vendet e Bashkimit Evropian, të ashtuquajturin sistem Entry-Exit. Më vjen keq, por duhet ta zbatojmë legjislacionin evropian”, deklaroi Hrisohoidis.
Ai shtoi se vonesat shkaktohen nga procedurat e detyrueshme të kontrollit, por edhe nga infrastruktura e vjetëruar greke në pikat kufitare.
“Problemi është i dyfishtë. Procedurat kërkojnë kohë dhe nuk mund të anashkalohen, pasi Komisioni Evropian insiston në zbatim të plotë. Çdo shtetas nga vendet e treta dhe çdo polic kufitar duhet të kalojë disa sekonda apo minuta në procesin e kontrollit. Së dyti, infrastruktura jonë është e vjetëruar dhe ka nevojë për rinovim”, tha ministri grek.
