Vjenë, 9 qershor Zhurnal.mk – Kryeministri në detyrë i Kosovës, Albin Kurti, është pritur në takim bilateral nga kancelari i Austrisë, Christian Stocker, në kuadër të vizitës së tij zyrtare në Vjenë.
Sipas njoftimit të Zyrës së Kryeministrit, Kurti falënderoi Austrinë për mbështetjen e vazhdueshme ndaj Kosovës që nga vitet 90-ta, në procesin e shtetndërtimit, në rrugën drejt integrimit evropian, si dhe për kontributin në kuadër të KFOR-it.
“Teksa vlerësoi mbështetjen e Austrisë ndaj Kosovës të shprehur në Komitetin e Ministrave, në Kishinau në maj të vitit 2026, kryeministri në detyrë Kurti theksoi se një nga prioritetet më të larta të Qeverisë së Republikës së Kosovës mbetet anëtarësimi në Këshillin e Evropës”, thuhet në njoftim.
Kurti nënvizoi rëndësinë e vazhdimit të mbështetjes nga Austria dhe rolit të saj në Asamblenë Parlamentare të Këshillit të Evropës.
Po ashtu, ai tha se mirëpret deklaratën e kancelarit Stocker se “Bashkimi Evropian nuk është i plotë, i sigurt dhe i qëndrueshëm pa Ballkanin Perëndimor”.
“Pasi tha se Republika e Kosovës është e përcaktuar, e angazhuar dhe e përkushtuar në rrugën e saj të anëtarësimit, kryeministri në detyrë Kurti foli për rëndësinë që BE-ja të përgjigjet me dhënien e statusit të shtetit kandidat dhe hapjen e negociatave”, thuhet më tej në njoftim.
Gjatë takimit, Kurti dhe Stocker diskutuan edhe për thellimin e marrëdhënieve dypalëshe ndërmjet Kosovës dhe Austrisë, me theks të veçantë te bashkëpunimi ekonomik e tregtar, investimet, roli i mërgatës, energjia dhe transformimi digjital.
Në takim u bisedua gjithashtu për sigurinë, mbrojtjen dhe bashkëpunimin rajonal.
Në fund, Kurti uroi Austrinë për zgjedhjen si anëtare jo e përhershme e Këshillit të Sigurimit të Kombeve të Bashkuara për periudhën 2027-2028, ndërsa pranoi urime për fitoren në zgjedhjet e parakohshme parlamentare të 7 qershorit.
