Tiranë, 19 qershor, Zhurnal.mk – Gjykata e Posaçme e Shkallës së Parë për Korrupsionin dhe Krimin e Organizuar dënoi sot me 6 vite burg Pëllumb Gjokën dhe me 5 vite burg Ardit Hasanbegaj.
Gjoka u deklarua fajtor për kryerjen e veprës penale “Sigurimi i kushteve dhe i mjeteve materiale për të kryer vrasje”, në dëm të shtetasit K.M, D.D dhe I.L, kryer në bashkëpunim në kuadër të grupit të strukturuar kriminal dhe u dënua me 15 vjet burg.
Po ashtu ai u deklarua fajtor për kryerjen e veprës penale “Grupi i strukturuar kriminal”,dhe u dënua me 4 vjet burg.
Gjoka u dënua me 3 vite burg edhe për veprën penale “Korrupsioni aktiv i gjyqtarëve, prokurorëve, dhe funksionarëve të tjerë të sistemit të drejtësisë”.
Në bashkim të dënimeve të mësipërme ai u dënua përfundimisht me 9 vjet burg, ndërsa do i ulet 1/3 e dënimit, duke u dënuar përfundimisht me 6 vjet burgim. Vuajtja e dënimit për të pandehurin Pëllumb Gjoka fillon nga data e ekzekutimit të masës së sigurimit “arrest në burg”, 27 korrik 2023 pranë një burgu të sigurisë së lartë.
Po ashtu GJKKO dënoi Ardit Hasanbegaj për kryerjen e veprës penale “Sigurimi i kushteve dhe i mjeteve materiale për të kryer vrasje”, në dëm të shtetasve I.L dhe D.D, kryer në bashkëpunim të posaçëm, në kuadër të grupit të strukturuar kriminal me 7 vjet burgim.
Hasanbegaj u deklarua fajtor edhe për veprën penale “Grup i strukturuar kriminal”, dhe u dënua me 2 vite burg.
Në bashkim të dënimeve Hasanbegaj u dënua përfundimisht me 7 vjet e 6 muaj burg, ndërsa pas uljes me 1/3 të dënimit, u dënua përfundimisht me 5 vjet burg.
Vuajtja e dënimit për Hasanbegaj fillon nga data e ekzekutimit të masës së sigurimit “arrest në burg”, 27 korrik 2023, në një burg të sigurisë së lartë.
Në zbatim të Kodit Penal, atij i hiqet e drejta për të ushtruar funksione publike për një afat 5 vjeçar.
