Shkup, 21 korrik, Zhurnal.mk – Administrata Doganore, përmes Njësisë për Operacione në terren pranë Sektorit për Kontroll dhe Hetime, në periudhën e ardhshme do të zbatojë kontrolle të shtuara në terren mbi mjetet lundruese që përdoren në Liqenin e Ohrit. Aktivitetet e kontrollit do të fokusohen në verifikimin e statusit doganor të mjeteve lundruese dhe respektimin e detyrimeve ligjore sipas rregullativës doganore.
Administrata Doganore u bën thirrje të gjithë pronarëve dhe përdoruesve të mjeteve lundruese për të cilat nuk është kryer procedurë e rregullt doganore, që ta rregullojnë statusin e tyre në afatin më të shkurtër të mundshëm.
“Të gjitha mjetet lundruese që gjatë kontrollit do të konstatohet se kanë status të parregulluar doganor do të jenë objekt i procedurës së përcaktuar ligjore, me ç’rast do të ndërmerren masa për përcaktimin e detyrimeve dhe mbajtjen e përkohshme të mjeteve lundruese deri në përmbushjen e plotë të tyre sipas autorizimeve ligjore. Objekt kontrolli do të jenë edhe mjetet lundruese të personave jorezidentë, përdorimi i të cilave është i rregulluar me leje për import të përkohshëm, pas së cilës ato duhet të largohen nga territori doganor ose të nënshtrohen procedurës së rregullt doganore. Njëkohësisht do të kontrollohet edhe përmbushja e kushteve për drejtimin e mjeteve lundruese, pra nëse ato drejtohen vetëm nga persona që kanë të drejtë ligjore për këtë”, njofton Administrata Doganore.
Institucioni u bën thirrje qytetarëve dhe shtetasve të huaj të veprojnë në përputhje me rregullativën doganore në fuqi dhe të harmonizojnë në kohë statusin e mjeteve të tyre lundruese.
