Shkup, 21 korrik, Zhurnal.mk – Presidentja e Maqedonisë së Veriut, Gordana Siljanovska‑Davkova, dhe presidentja e Indisë, Droupadi Murmu, në takimin e tyre zyrtar në rezidencën presidenciale në Vodno, vlerësuan se dy shtetet kanë potencial të madh për thellimin e bashkëpunimit politik, ekonomik dhe kulturor. Të dyja presidente shprehën kënaqësi për intensifikimin e dialogut politik dhe për perspektivat e reja të partneritetit dypalësh.
Siljanovska‑Davkova theksoi se është koha që partneriteti ekonomik të arrijë cilësinë e marrëdhënieve politike mes dy vendeve. Ajo vuri në dukje se Maqedonia, e vendosur në kryqëzimin e korridoreve kryesore evropiane, me stabilitet politik, klimë të favorshme biznesi, fuqi punëtore të kualifikuar dhe qasje preferenciale në tregun evropian, mund të shërbejë si portë hyrëse për kompanitë indiane që synojnë zgjerim në Evropë.
Presidentja Murmu, në fjalimin e saj, theksoi se India dhe Maqedonia kanë hapësirë të gjerë për bashkëpunim në sektorët:
teknologjitë informative,
bujqësia,
përpunimi i ushqimit,
farmacia,
turizmi dhe gastronomia,
artet audiovizuale,
duke nënvizuar se të dyja palët janë të gatshme të zgjerojnë tregtinë dypalëshe dhe të nisin projekte të përbashkëta. Ajo rikujtoi se ekziston tashmë një memorandum bashkëpunimi në shëndetësi, i cili do të zgjerohet posaçërisht në fushën e mjekësisë tradicionale.
Thellimi i marrëdhënieve dypalëshe dhe hapja e ambasadës indiane në Shkup
Dy presidente diskutuan për ngritjen e marrëdhënieve në nivel më të lartë, përfshirë hapjen e një ambasade rezidente të Indisë në Shkup, si dhe pjesëmarrjen e Maqedonisë në iniciativa multilaterale të Indisë. U vlerësua pozitivisht rritja e intensitetit të kontakteve ministrore mes Shkupit dhe Nju Delhit, si dhe nevoja që komunikimi mes qeverive, parlamenteve dhe institucioneve të dy shteteve të bëhet më i shpeshtë dhe më i strukturuar.
Siljanovska‑Davkova shprehu pritje që fjalimi i presidentes Murmu në Kuvendin e Maqedonisë të kontribuojë në forcimin e bashkëpunimit parlamentar.
Trashëgimia historike dhe lidhjet kulturore
Në fjalimin e saj, Siljanovska‑Davkova theksoi se India nuk është vetëm një shtet, por një nga civilizimet më të mëdha dhe më të qëndrueshme të njerëzimit, vendlindja e Mahatma Gandit, Rabindranath Tagores dhe shumë figurave që kanë frymëzuar botën.
Ajo rikujtoi edhe lidhjen e veçantë mes dy popujve përmes Nënë Terezës, e lindur në Shkup dhe e cila ia kushtoi jetën popullit indian, duke u bërë simbol universal i humanizmit. Çmimet e larta ndërkombëtare që ajo mori, përfshirë Nobel për Paqe dhe dekoratën indiane Bharat Ratna, dëshmojnë për respektin e thellë që India ka ndaj saj. Siljanovska‑Davkova e quajti Nënë Terezën “urë shpirtërore mes dy kombeve”.
Ekonomia si prioritet i përbashkët
Presidentja e Maqedonisë vlerësoi transformimin e shpejtë ekonomik të Indisë dhe theksoi se ekziston një spektri mbresëlënës mundësish që presin të shndërrohen në projekte konkrete. Ajo përmendi sektorët ku kompanitë e të dy vendeve mund të bashkëpunojnë:
industria automobilistike,
farmaceutika,
shëndetësia,
teknologjitë informative,
energjia e rinovueshme,
bujqësia,
industria ushqimore,
makineria dhe prodhimi i avancuar.
Të dyja presidente folën edhe për të ardhmen e ekonomisë: inteligjencën artificiale, transformimin digjital, kërkimin shkencor, bashkëpunimin universitar dhe teknologjitë e reja.
Siljanovska‑Davkova shtoi se pritjet janë që këmbimi tregtar mes Indisë dhe Maqedonisë të arrijë gjysmë miliardi dollarë amerikanë brenda pesë viteve të ardhshme.
