Shkup, 18 gusht Zhurnal.mk – Kryetari i Komunës së Çairit dhe bashkëkryetari i VLEN-it, Visar Ganiu, ka shprehur mirënjohje për familjarët, miqtë, bashkëpunëtorët dhe qytetarët që i qëndruan pranë familjes së tij pas ndarjes nga jeta të babait.
Në një mesazh të publikuar pas përfundimit të pesë ditëve të pames, ai falënderoi të gjithë ata që udhëtuan nga Maqedonia e Veriut, Kosova, Shqipëria, Presheva dhe diaspora për të ndarë dhimbjen me familjen.
“Prania juaj e bëri dhimbjen më të përballueshme dhe heshtjen e një shtëpie që sapo kishte humbur njeriun e saj, më pak të rëndë”, shkruan Ganiu.
Ai shprehu mirënjohje edhe për ata që nuk mundën të ishin fizikisht të pranishëm, por që u solidarizuan përmes telefonatave, mesazheve dhe fjalëve të ngushëllimit.
Ganiu tha se gjatë ditëve të pames familja dëgjoi shumë rrëfime për babain e tij, duke e njohur atë përmes kujtimeve që të tjerët kishin për të.
“Babë, gjithë nderimi dhe respekti që të bënë këto ditë na treguan sa shumë kishe lënë pas te njerëzit që të njohën e të deshën”, shkruan ai.
Në fund, ai e përmbyll mesazhin me fjalët: “Qofsh i Xhenetit, babë. Kujtimi dhe emri yt qofshin gjithmonë me ne!”
