31 zjarre në Maqedoninë e Veriut, dy ende aktive, flakët kalojnë edhe në Kosovë

Shkup, 5 shtator Zhurnal.mk – Maqedonia e Veriut vijon të përballet me zjarre në hapësira të hapura. Deri sot në orën 07:30 janë regjistruar gjithsej 31 vatra zjarri në territorin e vendit, njofton Qendra për Menaxhim me Kriza (QMK).

Nga 31 zjarret e regjistruara, dy janë ende aktive, pesë janë nën kontroll, ndërsa 24 janë shuar. Një nga vatrat aktive ndodhet në fshatin Graçan, në Komunën e Gjorçe Petrovit, ku flakët kanë kaluar edhe në territorin e Kosovës.

Vatra tjetër aktive është në zonën Kajorec, pranë fshatit Belicë, në Komunën e Makedonski Brodit. Ndërkohë, pesë zjarre janë nën kontroll në Strugë, Saraj, Çuçer-Sandevë, Kratovë dhe Dellçevë. Sipas QMK-së, 24 zjarret e tjera të raportuara gjatë periudhës së fundit janë shuar.