Katmandu, 6 shtator Zhurnal.mk – Njëmbëdhjetë ditë pasi përmbytjet dhe rrëshqitjet masive të dheut goditën rajonin e lumit Bhotekoshi në Nepal, është gjetur gjallë një 64-vjeçare.
Chandika Shrestha u gjet e bllokuar në katin e katërt të një banese katërkatëshe në zonën Betravati, në distriktin Nuwakot. Ndërtesa ishte pothuajse tërësisht e mbuluar nga balta, shkëmbinjtë dhe mbeturinat e sjella nga përmbytjet.
Ekipet e kërkim-shpëtimit, të cilat po punonin në zonë, dëgjuan zëra të dobët që vinin nga brenda ndërtesës së dëmtuar. Shpëtimtarët ndaluan menjëherë përdorimin e makinerive të rënda dhe nisën të largonin me kujdes materialet e grumbulluara, derisa arritën të hapnin një vrimë në mur dhe të nxirrnin gruan.
Banesa e Shresthës ishte marrë nga ujërat dhe më pas ishte mbuluar nga një shtresë e madhe balte. Ajo kishte mbetur e bllokuar në katin e sipërm, ndërsa pjesa tjetër e ndërtesës ishte shkatërruar.
Pas shpëtimit, 64-vjeçares iu dha menjëherë ujë dhe ndihma e parë. Më pas ajo u transportua me helikopter drejt një spitali në Katmandu, ku po merr trajtimin mjekësor.
Shpëtimi i saj është cilësuar si një mrekulli, pasi gruaja kishte arritur të mbijetonte për 11 ditë e bllokuar në kushtet e një prej fatkeqësive natyrore më të rënda që ka goditur Nepalin vitet e fundit.
Përmbytjet dhe rrëshqitjet e dheut, të shkaktuara nga reshjet intensive dhe prurjet e fuqishme të lumenjve Bhotekoshi dhe Trishuli, kanë shkaktuar qindra viktima, ndërsa mijëra persona vijojnë të konsiderohen të zhdukur.
Historia e Chandika Shresthës ka sjellë një moment shprese mes tragjedisë, ndërsa ekipet e kërkim-shpëtimit vazhdojnë operacionet për gjetjen e personave të tjerë që ende rezultojnë të zhdukur.
