Komisioni për Komunitete miraton Projektligjin për Parandalimin e Pastrimit të Parave

Prishtinë, 15 tetor, Zhurnal.mk – Komisioni për të Drejtat dhe Interesat e Komuniteteve dhe Kthim ka miratuar me shumicë votash Projektligjin për ndryshimin dhe plotësimin e Ligjit për Parandalimin e Pastrimit të Parave dhe Luftimin e Financimit të Terrorizmit, nga aspekti i të drejtave dhe interesave të komuniteteve, raporton Ekonomia Online.

Kryetari i Komisionit, Fahrush Rexhepi, tha se komisioni ka pranuar raportin nga Komisioni Funksional për Buxhet, i cili përmban 12 amendamente.

“Ne kemi marrë raportin nga Komisioni Funksional për Buxhet, ky raport ka 12 amendamente”, tha Rexhepi.

Ndërkaq, shqyrtimi i fushëveprimit të Komisionit dhe i Planit të Punës për sesionin vjeshtor 2026 është shtyrë për mbledhjen e radhës.