Shkup, 19 tetor Zhurnal.mk – Në debatin e mbrëmjes në emisionin “Top Tema” morën pjesë katër kandidatët për drejtues të Prokurorisë për Ndjekjen e Krimit të Organizuar dhe Korrupsionit: prokurorët Lidija Raiçeviq, Iskra Haxhi Vasileva, Faton Azizi dhe Trajçe Pelivanov.
I pyetur se cila do të jetë linja e parë e Prokurorisë që ndjek krimin e organizuar dhe korrupsionin në vend, Faton Azizi theksoi se në fokus të programit të tij është forcimi i kapaciteteve të qendrës hetimore.
“Sipas meje, në këtë mënyrë prokurori publik fiton pavarësi më të madhe në disa aspekte. Këtu përfshihet pavarësia e hetuesve, angazhimi i përhershëm i prokurorëve dhe krijimi i një ekipi rreth prokurorit publik. Këto janë disa parakushte që realisht krijojnë mundësi që prokurori publik të përfshihet në mënyrë më efikase në luftën kundër krimit”, tha Azizi.
I pyetur nëse pret mbështetje financiare për realizimin e këtyre planeve, Azizi tha se fillimisht do të bisedojë me prokurorin publik të shtetit, pasi Prokuroria Publike është institucion që varet nga fondet që i ndan pushteti ekzekutiv.
Për këtë çështje, sipas tij, do të zhvillojë bisedime të hollësishme edhe me ministrin e Drejtësisë, ministrin e Financave dhe, nëse do të jetë e mundur, edhe me kryeministrin.
“Për rezultate nevojitet mbështetje financiare. Luftën kundër krimit e zhvillojmë me burimet që kemi aktualisht. Prokuroria përpiqet t’i ndjekë trendet, por nevojiten më shumë mjete financiare për të arritur rezultate më të mira”, theksoi Azizi.
