Shkup, 13 nëntor – Sot prita në takim pune një delegacion nga Zyra e Kombeve të Bashkuara për Shërbime Projektesh – UNOPS, të udhëhequr nga drejtori rajonal për Evropë dhe Azinë Qendrore, Tim Lardner, i cili po zhvillon një vizitë të rëndësishme në vendet e Ballkanit Perëndimor.
I urova mirëseardhje dhe shpreha mirënjohjen time për bashkëpunimin dhe mbështetjen që UNOPS-i i ofron vazhdimisht Republikës së Maqedonisë së Veriut, veçanërisht për realizimin e projekteve të rëndësishme me ndikim të drejtpërdrejtë në mbrojtjen e mjedisit jetësor, si projekti “Ajri i Pastër”, të cilin po e zbatojmë së bashku me Misionin e BE-së dhe UNOPS-in për të luftuar ndotjen dhe për të përmirësuar cilësinë e ajrit në vendin tonë.
Me UNOPS-in po realizojmë një sërë projektesh për përballimin e sfidave mjedisore.
Një shembull i shkëlqyer i bashkëpunimit tonë është projekti për sanimin e deponisë me lindan në ish-fabrikën OHIS, ndërsa në një të ardhme të afërt planifikojmë që këtë praktikë ta zbatojmë edhe në lokacione të tjera, si Jugohromi dhe fabrika të tjera.
