Shkup, 30 qershor Zhurnal.mk – Aleanca për Shqiptarët ka vazhduar procesin e konsolidimit dhe riorganizimit të strukturave partiake, ndërsa mbrëmjen e së martës u mbajt Kuvendi Zgjedhor i Degës në Kërçovë, ku u zgjodhën organet e reja drejtuese.
Me shumicën e votave të delegatëve të pranishëm, Genc Selmani u zgjodh kryetar i ri i Degës së Aleancës për Shqiptarët në Kërçovë.
Gjatë punimeve të kuvendit u zgjodhën edhe kryesia, sekretariati i degës, si dhe delegatët që do ta përfaqësojnë Degën e Kërçovës në Kongresin e V të Aleancës për Shqiptarët.
Nga partia bëjnë të ditur se kuvendi u zhvillua në një atmosferë bashkëpunimi, përgjegjësie dhe angazhimi politik, duke reflektuar unitetin dhe vendosmërinë e anëtarësisë për forcimin e organizimit partiak në këtë komunë.
Në fjalën e tij para të pranishmëve, kryetari i Aleancës për Shqiptarët, Arben Taravari, theksoi se partia mbetet e përkushtuar në zgjerimin, konsolidimin dhe fuqizimin e strukturave të saj organizative në të gjitha degët.
Sipas tij, me një organizim të fortë dhe funksional, Aleanca për Shqiptarët do të vazhdojë të jetë zëri i shqiptarëve në Maqedoninë e Veriut, duke punuar për mbrojtjen e interesit publik, forcimin e barazisë dhe ndërtimin e një të ardhmeje më të sigurt dhe më dinjitoze për të gjithë qytetarët.
