Ministri për Evropën dhe Punët e Jashtme, Ferit Hoxha njoftoi sot nisjen e një cikli bashkëbisedimesh me të rinjtë dhe studentët në mbarë vendin, në kuadër të nismës “BE dhe Ti – Evropa fillon këtu”.
Përmes një postimi në rrjetin social X, Hoxha bëri të ditur se aktiviteti u çel së bashku me ministren e Shtetit për Administratën Publike dhe Antikorrupsionin, Adea Pirdeni, ndërsa në vijim pritet t’i bashkohet edhe Kryenegociatorja për integrimin evropian, Majlinda Dhuka.
Hoxha theksoi se, ndalesa e parë e turit u zhvillua në Shkollën e Magjistraturës, ku u zhvillua një bashkëbisedim me studentë dhe magjistratë të ardhshëm.
“Qëllimi ynë është i qartë: të bisedojmë për Evropën, për procesin e integrimit, si dhe për të sotmen e të ardhmen tonë të përbashkët, nën titullin “BE & Ti – Evropa fillon këtu””, theksoi Hoxha.
Ai nënvizoi rëndësinë e përfshirjes së të rinjve në procesin e integrimit, duke theksuar se reformat realizohen në vend, ndërsa ndikimi i tyre prek drejtpërdrejt qytetarët.
“Takimet zhvillohen shpesh në Bruksel, por reformat bëhen këtu; monitorimi kryhet atje, por ndikimi ndihet këtu; vendimet merren atje, por rezultatet mbeten këtu, tek qytetarët”, u shpreh ministri.
Hoxha e cilësoi procesin e anëtarësimit në Bashkimi Evropian si një përpjekje të përbashkët kombëtare.
“Anëtarësimi në Bashkimin Evropian është kantieri ynë madhor, ku secili prej nesh ka një rol. Është një histori që po e shkruajmë së bashku, çdo ditë, me punë dhe përkushtim”, deklaroi ai.
