Paketa e re fiskale dhe shpopullimi janë dy shqetësimet kryesore të bizneseve turistike në Razëm. Administratori i një biznesi hotelerie, Shirazi Kastrati, paralajmëron se ndryshimet e propozuara mund të rëndojnë ndjeshëm sektorin, i cili ka nevojë për lehtësira për të konkurruar me vendet e rajonit.
“Mendoj që në qoftë se paketa fiskale do të aprovohet, për biznesin e turizmit do të jetë përfundimisht shkatërrimtare. Të gjitha bizneset kanë lobuar për të ulur TVSH-në dhe kostot, sepse kjo është në ndihmë të biznesit.Shtetet rreth e rrotull nesh kanë politika shumë favorizuese dhe lehtësuese për sektorin e turizmit”, tha Shirazi Kastrati, Administrator biznesi në Razëm.
Një tjetër problem mbetet largimi i të rinjve, që sipas Kastratit po krijon vështirësi në sigurimin e punonjësve dhe rrezikon furnizimin e bizneseve me produkte vendase. Pasojat, sipas tij, do të bëhen edhe më të dukshme në vitet e ardhshme.
“Komplet pjesa e rinisë këtu ka larguar dhe kjo do të reflektohet edhe te prodhimi, produktet që do të marrim ne në vend, jo thjesht te krahu i punës, por edhe te produktet. Ku do ta marrim qumështin, ku do ta marrim mishin, ku do ta marrim pataten. Janë shumë produkte që na furnizon në zonë dhe mbas pak vitesh do të kemi problematika”, shtoi Kastrati.
Sipërmarrësit në Razëm kërkojnë më shumë mbështetje institucionale, investime në infrastrukturë dhe politika fiskale lehtësuese. Sipas tyre, frenimi i shpopullimit dhe krijimi i kushteve për zhvillimin e sipërmarrjes janë thelbësore për të ardhmen e turizmit dhe ekonomisë lokale.
