Shkup/Sofia, 1 prill, Zhurnal.mk – Qeveria e Bullgarisë sot i ka përsëritur kërkesat qëndrimet e saja ndaj qeverisë së Maqedonisë së Veriut për çështjen e të drejtave të bashkësisë bullgare dhe plotësimin e kushtit për vazhdimin e rrugës për në BE, përkatësisht kërkesën për ndryshim të kushtetutës për bullgarët në vend.
Ministria e jashtme e Bullgarisë, përmes një komunikate tha se organizatat e bashkésisé bullgare në Maqedoninë e Veriut “kanë shpërndarë një letër zyrtare” në lidhje me një draft të rishikuar të Planit të Veprimit për Mbrojtjen e të Drejtave të Personave të paraqitur nga qeveria në Shkup.
“Kujtojmë se ky Plan Veprimi është një dokument themelor, pjesë e Konsensusit Evropian të vitit 2022, zbatimi i të cilit do të monitorohet gjatë gjithë procesit të negociatave për pranimin e ardhshëm të Maqedonisë së Veriut në BE. Kur, në mënyrë të pashmangshme, ndryshimet e pritura kushtetuese i njohin zyrtarisht bullgarët si subjekte legjitime të të drejtave civile në vendin fqinj, Plani i Veprimit do të duhet të sigurojë zbatimin praktik dhe mbrojtjen e këtyre të drejtave të garantuara kushtetuese,” tha ministria bullgare.
Sipas kësaj ministrie, në qëndrimin e tyre, organizatat e bullgarëve “shprehin shqetësim për mungesën e reflektimit të plotë në draftin e Planit të Veprimit të komenteve dhe sugjerimeve të tyre nga dhjetori 2025.”
“Sipas tyre, dokumenti vazhdon të mos adresojë mjaftueshëm problemet e rëndësishme me të cilat përballet komuniteti bullgar në Maqedoninë e Veriut dhe nuk ofron mekanizma efektivë për t’i kapërcyer ato. Ndër këto mangësi janë: presioni sistematik institucional, zbatimi i pabarabartë i ligjeve, kufizimet e ashpra mbi vetëvendosjen dhe lirinë e shoqërimit, mungesa e mbrojtjes kundër diskriminimit dhe krimeve të urrejtjes të sponsorizuara politikisht,” thotë ministria e jashtme bullgare duke u thirrë në letrën e organizatave bullgare.
Kjo ministri sot shprehi përkrahje të plotë këtyre ankesave dhe kërkesave dhe përsëriti thirrjet e saj ndaj qeverisë së Hristijan Mickoskit, duke përkujtuar qëndrimin se pa futjen e bashkësisë bullgare në kushtetutën nuk mund të zhbllokohet rruga e vendit për anëtarësim në BE.
“Ministria e Punëve të Jashtme mbështet kërkesat legjitime të komunitetit bullgar në Maqedoninë e Veriut dhe i bën thirrje qeverisë së vendit fqinj që t’u kushtojë vëmendje thirrjeve të qytetarëve të saj dhe të përmbushë të gjitha angazhimet e marra ndaj BE-së dhe Bullgarisë. Ne presim që Maqedonia e Veriut të angazhohet sinqerisht dhe vazhdimisht për krijimin e një mekanizmi të besueshëm, efektiv dhe të qëndrueshëm për mbrojtjen e të drejtave themelore të njeriut, në mënyrë që të jetë në gjendje të sigurojë mbështetje konsensuale për rrugën e saj evropiane në të ardhmen,” tha në komunikatë ministria bullgare.
Reagimi i sotëm nga Sofia vjen një ditë pasi që Mickoski përsëriti qëndrimin e tij se nuk do të ketë plotësim të kërkesës së Bullgarisë dhe BE-së për të ndryshuar kushtetutën përderisa Bullgaria nuk do të plotësojë kërkesat e tij për të drejtat e bashkësisë maqedonase në Bullgari, dhe së dyti përderisa Bullgaria dhe vet BE nuk japin garancione zyrtare se Sofia nuk do të ketë kërkesa e kushtëzime shtesë për çështjet që kanë të bëjnë me identitetin dhe gjuhën maqedonase, të cilën Bullgaria refuzon që ta njohë si të tillë, por e trajton si derivat të gjuhës bullgare.
