Pas një sage disamujore, ligjvënësit në Dhomën e Përfaqësuesve dhe Senatin e SHBA-së – me vetëm një votë “kundër” – miratuan dje në mbrëmje projektligjin për të detyruar Departamentin Amerikan të Drejtësisë të publikojë një mori dosjesh – që lidhen me hetimet ndaj Jeffrey Epstein, sipas BBC.
Financieri amerikan, Jeffrey Epstein, i akuzuar për abuzime seksuale, shfrytëzim prostitucioni dhe trafik minorenësh, vdiq në burg në vitin 2019.
Akti i Transparencës së dosjeve të Epstein u miratoi dje nga Dhoma e Përfaqësuesve me vetëm një votë kundër (427 pro dhe një kundër).
Projektligji më pas iu drejtua Senatit, i cili votoi unanimisht për të përshpejtuar miratimin e tij.
Ky veprim vjen ndërsa të mbijetuarit e abuzimit të Epstein kanë kaluar disa muaj në Capitol Hill – duke bërë thirrje për miratimin e projektligjit.
Senati e miratoi projektligjin përpara se Dhoma e Përfaqësuesve ta dërgonte atë zyrtarisht. Kjo do të thotë që projektligji do të kalojë zyrtarisht sot në Kongres.
Presidenti amerikan, Donald Trump, i cili bëri fushatë kundër projektligjit përpara se të bënte një kthesë të papritur, ka premtuar ta nënshkruajë atë dhe ta bëjë ligj.
Departamenti Amerikan i Drejtësisë, më pas ka 30 ditë kohë për të publikuar të gjitha dosjet që lidhen me Epstein dhe bashkëpunëtoren e tij, Ghislaine Maxwell.
Por, prokurori i përgjithshëm mund të refuzojë të publikojë disa informacione, me arsyetimin se kjo do të përbënte rrezik për viktimat e mitura ose do të ndërhynte në hetim.