Shkup, 22 shtator, Zhurnal.mk – Venko Filipçe pretendon se në Maqedoninë e Veriut ekziston një formë e ndikimit hibrid përmes mediave dhe paralajmëroi se për këtë çështje do të njoftohen përfaqësuesit e Bashkimit Evropian.
Ai tha se bëhet fjalë për subjekte mediatike të lidhura me Serbinë, duke përmendur edhe rolin e kompanive serbe në funksionimin e tyre. Sipas Filipçes, në vend operojnë subjekte mediatike pa lejet përkatëse, ndërsa sinjali i tyre ritransmetohet përmes Serbisë.
Filipçe akuzoi Qeverinë se nuk po reagon ndaj kësaj situate dhe paralajmëroi se gjatë javës do t’i informojë me shkrim presidenten e Komisionit Evropian, Ursula von der Leyen, presidentin e Këshillit Evropian, Antonio Costa, si dhe komisioneren evropiane Marta Kos.
Sipas tij, pas këtyre aktiviteteve qëndrojnë interesa të huaja, ndërsa opozita, siç tha, ka për detyrë të mbrojë interesat e vendit dhe të angazhohet për përparimin e tij.
