Tiranë, 10 qershor, Zhurnal.mk – Ministri për Evropën dhe Punët e Jashtme, Ferit Hoxha mori pjesë në një diskutim të organizuar në Dublin (Republika e Irlandës) nga Instituti për Çështje Ndërkombëtare dhe Evropiane (IIEA).
Në një postim në rrjetin social “X”, Hoxha bën të ditur se gjatë diskutimeve u shkëmbyen mendime mbi temën “Rruga evropiane e Shqipërisë”.
“Gjithmonë një kënaqësi të angazhohesh me shoqërinë civile dhe komunitetin e instituteve kërkimore”, shkruan Hoxha.
Sipas ministrit, procesi i integrimit në Bashkimin Evropian ka hyrë në fazën më dinamike, më sfiduese dhe më vendimtare që nga fillimi i transformimit demokratik të vendit, më shumë se 30 vjet më parë.
“Diskutuam për progresin e reformave në Shqipëri, vrullin e ri të zgjerimit të BE-së dhe hapat që duhen ndërmarrë drejt objektivit strategjik të anëtarësimit në Bashkimin Evropian. Po ashtu, u ndalëm te rëndësia gjeopolitike e procesit të zgjerimit dhe nevoja për një proces pranimi të besueshëm dhe të bazuar në meritë”, thekson Hoxha.
“Vlerësuam mbështetjen e vazhdueshme të Irlandës për zgjerimin e BE-së dhe rolin që Presidenca e ardhshme irlandeze e Këshillit të BE-së mund të luajë në diskutimet për të ardhmen e Evropës dhe integrimin e vendeve aspirante. Falënderoj IIEA-n dhe të gjithë pjesëmarrësit për këtë diskutim të vlefshëm”, përfundon Hoxha postimin e tij.
