Shkup, 17 shkurt – Lidhja e sindikatave sot e realizoi bllokadën e fundit nga tre të paralajmëruara të institucioneve të synuara. Para Qeverisë sot kërkuan të propozojë ndryshime në Ligjin për Pagën Minimale me të cilat do të rritet paga minimale në 600 euro dhe të gjitha pagat e tjera për 100 euro.
Nga LSM-ja po lënë hapësirë për një marrëveshje deri në fund të shkurtit, dhe nëse nuk arrihet ndonjë marrëveshje, në gjysmën e parë të marsit, paralajmërojnë grevë të përgjithshme dhe protestë të punëtorëve. Deri atëherë, nuk përjashtohet mundësia e bllokadave të synuara në qytete të tjera të vendit.
“Nëse deri në fund të shkurti nuk bien dakord dhe nuk diskutojnë për rritjen e pagave minimale dhe të gjitha pagave të tjera, do të pasojë një grevë e përgjithshme, me një protestë të përgjithshme të punëtorëve gjatë orarit jo të punës, në të cilën do të ftohen të gjithë punëtorët. Ne do të sigurojmë transportin, në mënyrë që të mos ketë asnjë justifikim. Kjo do të jetë në gjysmën e parë të marsit, sepse marsi është muaji kur duhet të përcaktohet paga minimale”, tha kryetar i LSM-slm Sllobodan Trendafilov, i cili i paraqiti para Qeverisë konkludimet e fundit të arritura nga Kryesia e LSM-së si një nga organet më të larta të sindikatës.
Trendafilov tha se “bien në ujë argumentet e punëdhënsve për produktivitet më të lartë të punëtorëve sepse të dhënat nga ILO-ja tregojnë se një punëtor me një pagë minimale prej 24.792 denarë fitron 290.000 denarë në muaj për shefin, gjegjësisht vetëm 17 për qind e asaj torte u jepet punëtorëve si pagë”.
“I dërgojmë mesazh Qeverisë – në seancën e sotme të diskutojnë shumë seriozisht për kërkesën e punëtorëve për rritje të pagës minimale, si dhe për rritje të pagave të tjera. U kërkojmë atyre të mendojnë shumë seriozisht dhe të diskutojnë, ose të lirojnë punëdhënësit ose t’ua shtrijnë dorën edhe biznesit ashtu siç do t’ua shtrijnë dorën punëtorëve për rritje të pagave dhe për lirimin e kontributeve të detyrueshme të sigurimeve shoqërore. U kujtojmë atyre se një vit më parë, kur ishim në negociata, ata e refuzuan në mënyrë të njëanshme këtë, megjithëse LSM-ja dhe punëdhënësit kishin rënë dakord të rrisnin pagat e të gjithë punëtorëve në vend për të paktën 6.000 denarë”, tha Trendafilov.
Lidhur me deklaratën e bërë dje nga kryetari i Odës Ekonomike, Branko Azeski në Shtip, lideri i LSM-së thotë se punëdhënësit kanë mundësi deri në fund të shkurtit të thonë se sa janë të gatshëm të rrisin pagat e punëtorëve.
“Deri në fund të shkurtit, ata mund të ulen, të dakordohen dhe të thonë se sa janë të gatshëm të rrisin pagat e punëtorëve, sepse justifikimi kryesor – produktiviteti që kishin për 35-36 vjet në Maqedoni – u kushtoi atyre emigrimin e punëtorëve më të kualifikuar nga vendi, dhe jo vetëm të punëtorëve të kualifikuar, por edhe të familjeve të tyre”, tha Trendafilov.
Nëse nuk plotësohen kërkesat e LSM-së, në mars do të kryhet harmonizim i pagës minimale, e cila sipas llogaritjeve do të arrijë nga 1.500 deri 1.700 denarë, të cilën punëtorët do ta marrin në pagën e prillit.
LSM mbetet e përkushtuar ndaj kërkesës për rritje të pagave, me sqarim se po rriten shpenzimet e jetesës dhe vlera e shportës konsumatore sindikale, e cila në janar në krahasim me dhjetorin është rritur për gati një mijë denarë. ls/
Foto: MIA