Sekretari amerikan i Shtetit, Marco Rubio, deklaroi se SHBA-ja mund të përmbushë objektivat e saj ushtarake kundër Iran pa vendosur trupa tokësore, ndërsa mbi 1000 ushtarë shtesë janë urdhëruar të vendosen në Lindjen e Mesme.
Rubio theksoi se operacionet ushtarake synojnë të dobësojnë ndjeshëm kapacitetet ushtarake të Iranit, përfshirë marinën, forcën ajrore dhe sistemet e raketave.
Ai shtoi se këto veprime synojnë të pengojnë Teheranin të zhvillojë apo të mbrojë një program të mundshëm bërthamor.
Sipas tij, objektivat janë duke u arritur më shpejt se sa ishte planifikuar fillimisht.
“Ne jemi përpara afatit për shumicën e objektivave dhe mund t’i përmbushim pa asnjë trupë tokësore”, deklaroi ai.
I pyetur për vendosjen e trupave shtesë në rajon, Rubio tha se presidenti Donald Trump duhet të jetë i përgatitur për “raste të papritura”, pa dhënë detaje konkrete mbi natyrën e këtyre skenarëve.
Ai gjithashtu parashikoi se konflikti do të përfundojë brenda javësh dhe jo muajsh, duke theksuar se operacioni është në përputhje me afatet e planifikuara.
