Moskë, 29 tetor, Zhurnal.mk – Kryebashkiaku i Moskës, Sergei Sobianin, deklaroi sot se më shumë se 600 dronë ishin lëshuar drejt rajonit të Moskës, në ditën e dytë të samitit Rusi-Afrikë që po zhvillohet në kryeqytetin rus.
“Nnga ora 20:30 e 28 tetorit deri në orën 07:00 të 29 tetorit, 613 dronë u drejtuan drejt rajonit të Moskës. Shumica u neutralizuan nga mbrojtja kundërajrore e Ministrisë së Mbrojtjes, në distancë të madhe”, bëri të ditur Sobianin në llogarinë e tij në Telegram, duke shtuar se 231 dronë të tjerë u shkatërruan teksa po afroheshin drejt Moskës.
Sipas Kremlinit, kryeqyteti rus pret që prej së mërkurës samitin e tretë Rusi-Afrikë, në të cilin janë ftuar delegacione nga 48 vende, 22 prej të cilave të kryesuara nga krerët e shteteve.
Këto sulme ndodhin në një kohë kur Moska dhe Kievi po përgatiten të rifillojnë në nëntor negociatat e paqes, me ndërmjetësimin e Shteteve të Bashkuara, më shumë se katër vjet e gjysmë pas nisjes së ofensivës së gjerë ruse në Ukrainë.
Gjatë muajve të fundit, të dyja vendet kanë shtuar sulmet me dronë dhe lloje të tjera predhash, duke shkaktuar viktima në të dyja palët.
Në mesin e shtatorit, Ukraina kishte lëshuar rreth 1 600 dronë drejt rajonit të Moskës, në atë që, sipas Sobianinit, ishte sulmi më i madh i këtij lloji brenda një dite që nga fillimi i luftës.
