Shkup, 1 mars, Zhurnal.mk – Kryeministri i Maqedonisë së Veriut, Hristijan Mickoski, njoftoi se të punësuarit në sektorin e arsimit do të përfitojnë një rritje të pagave prej rreth 7,5 për qind.
Ai theksoi se kjo është pjesë e marrëveshjes kolektive dhe se që nga formimi i Qeverisë së tij, pagat në arsim janë rritur gjithsej për rreth 20 për qind. “Prej sot do të kemi rritje të pagave në arsim, që është pjesë e marrëveshjes kolektive, me 7,5 për qind të reja. Kjo do të thotë se nga nëntori i vitit 2024 e deri sot, pagat e të punësuarve në arsim janë rritur për 20 për qind,” deklaroi Mickoski pas ceremonisë së lëshimit në përdorim të Shtëpisë së Kulturës në Gazi Babë.
Kjo rritje pritet të përmirësojë standardin e punonjësve arsimorë dhe të nxisë motivimin për përmirësimin e cilësisë së arsimit në vend.
