Shkup, 19 shtator Zhurnal.mk – Ne jemi një prioritet kryesor për SHBA-në në rajon, ata e shohin Maqedoninë dhe këtë Qeveri si një mike të ngushtë dhe po diskutojmë për projekte kapitale në energjetikë dhe infrastrukturë. Besoj se në vitet që vijnë, ky partneritet strategjik do të japë shumë projekte kapitale që do të kenë rëndësi historike, tha kryeministri Hristijan Mickoski në intervistën për MIA-n të zhvilluar në Uashington gjatë vizitës së tij në Shtetet e Bashkuara të Amerikës.
Ai thekson se gjatë takimeve që zhvilloi, u diskutua financimi i mundshëm i Çebrenit dhe Galishtes, si dhe tubacioni i gazit në vend që duhet të lidhë terminalin LNG në Aleksandropoli me Evropën Qendrore, dhe miniera e antimoniut në Lluke të Kriva Pallankës. Po kërkohet, siç thekson, investirot edhe për Çebrenin dhe Galishten, dhe tashmë është biseduar në DFC – korporatën financiare të zhvillimit, me një portofol financiar prej rreth 200 miliardë dollarësh, me Karollajn Vik, e cila është përgjegjëse për zhvillimin dhe investimet në të gjithë botën.
“Diskutuam për financimin e mundshëm të Çebrenit dhe Galishtes, diskutuam edhe për një lloj tjetër investimesh infrastrukturore dhe energjetike, të të dhënave që do të bënte Qeveria, si dhe për investimet private që do të vinin nga Amerika në Maqedoni”, thekson Mickoski në intervistën për MIA-n dhe thekson se administrata e presidentit Tramp e sheh Maqedoninë si prioritet i lartë në rajon.
“Vlerësoj se në vitet në vijim nga ky partneritet strategjik do të lindin shumë projekte kapitale që do të kenë rëndësi historike. Një iniciativë e tillë tashmë është njoftuar, miniera e antimoniut në Kriva Pallankë. Aty janë të pranishëm në pjesën e grantimit të PD prej pesë milionë dollarësh, për zhvillimin e projektit në Kërstov Doll, në vendin Lluke, në rajonin e Pallankës, por ky është vetëm fillimi. Unë them se bazuar në atë bisedë që pata në DFC me Karolajn Vikun, interesi është i madh. Qëllimi ynë si Qeveri është të sigurojmë financimin e projektit Çebren dhe Galishte. Nga ana e tyre ka interes, u prezantua projekti i njëjtë, kemi krijuar kanal komunikimi midis Qeverisë dhe DFC-së, dhe kjo është gjë e mirë. Kur bëhet fjalë për infrastrukturën strategjike dhe kritike, këtu janë gazsjellësit që po ndërtojmë, këtu janë autostradat, Korridori 8 dhe Korridori 10-d dhe hekurudha që do të modernizohet, e cila është pjesë e Korridorit 10 dhe hekurudha që po ndërtojmë, e cila është pjesë e Korridorit 8”, saktëson Mickoski.
Pala amerikane, siç thotë, është shumë e interesuar për gazsjellësin, me të cilin SHBA-ja do të bëhej furnizues serioz i rajonit me gaz të lëngshëm LNG.
“Duhet t’i shpjegohet më qartë publikut se cili është qëllimi i këtij gazsjellësi. Na duhet terminali i gazit natyror të lëngshëm, i njohur si terminali i LNG-së në Greqi – Aleksandropuli – që ta lidhim me Evropën Qendrore, për të qenë konkurrent i Rrjedhës Jugore. Kapaciteti është diku rreth tre miliardë metra kub, e nëse presioni rritet, mund të arrijë deri në gjashtë miliardë. Ajo që e bën të veçantë është se tubacioni është me dy drejtime. Deri më tani, si shtet kemi pasur vetëm një hyrje me një drejtim – Zhidilovë – me një kapacitet prej rreth 800 milionë metra kub, ose një miliard e 200 milionë me presion të rritur. Kjo do të thotë se kapaciteti i gazit që mund të përdorim nesër në Maqedoni me ndërtimin e këtij gazsjellësi është rritur në mënyrë dramatike, por për të qenë në rrugën e tranzitit, që është praktikisht qëllimi dhe ambicia jonë, duhet të përfundojmë edhe interkonnektorin verior me të cilin do të lidhemi me Serbinë fqinje. Dhe do të jetë me dy drejtime, kështu që kur t’i përfundojmë këto dy projekte, gjë që pres të jetë në fund të vitit 2028, pozicioni gjeostrategjik i vendit do të jetë krejtësisht ndryshe”, thekson kryeministri.
Në këtë moment, siç thekson, ne si shtet konsumojmë rreth gjysmë miliard metri kub në vit.
“Pra, do të kemi një kapacitet 12 herë më të madh për investime, për termocentrale me gaz që do të prodhonin energji elektrike, e cila më pas do të përdorej në disa qendra të dhënash, pastaj prej tyre do të nxirrnim mundësi për inteligjencën artificiale. Ky është plan serioz dhe i rëndësishëm për zhvillimin e vendit dhe se ku duhet të shkojë Maqedonia në të ardhmen”, thekson Mickoski.
Si “pika të ngushta” i thekson rrjetet e tensionit të lartë të transmetimit të energjisë elektrike.
“Jemi të lidhur shumë mirë me fqinjët tanë veriorë dhe jugorë me linja elektrike me nivel tensioni 400 kilovolt. Jemi të lidhur shumë mirë edhe me fqinjin tonë lindor, një linjë transmetimi 400 kilovoltëshe dhe dy linja paralele transmetimi 110 kilovoltëshe, dhe tani po ndërtojmë projektin me të cilin do të lidhemi me fqinjin tonë perëndimor, përsëri me një linjë transmetimi 400 kilovoltëshe. Kështu, ne do të jemi thjeshtë një kryqëzim energjetik kur bëhet fjalë për transmetimin e energjisë elektrike me tension të lartë. Të gjitha këto projekte janë infrastrukturë kritike. Të gjitha këto projekte rrisin qëndrueshmërinë në rajon, sigurinë dhe janë shumë të rëndësishme për krahun lindor të NATO-s. Ne si shtet mund ta shfrytëzojmë pozicionin tonë tashmë më të fortë gjeostrategjik dhe të përfitojmë nga e gjithë kjo për qytetarët, dhe të zhvillohemi më shpejt ekonomikisht. Ky është thelbi dhe ky është prioriteti i kësaj Qeverie”, thekson Mickoski në intervistë për MIA-n.
