Tiranë, 21 shtator, Zhurnal.mk – Nis sot në Tiranë takimi i 22-të i Komitetit Parlamentar të Stabilizim-Asociimit (KPSA) BE-Shqipëri, i cili do të vijojë edhe gjatë ditës së martë, datë 22 shtator.
Punimet e takimit do të nisin në orën 10:00 dhe do të drejtohen nga bashkëkryetarët e delegacioneve, Taulant Balla, në cilësinë e kreut të delegacionit të Kuvendit të Shqipërisë, dhe Marco Tarquinio, kreu i delegacionit të Parlamentit Evropian. Takimi do të përshëndetet edhe nga Kryetari i Kuvendit, Niko Peleshi.
Në takimin dyditor do të marrin pjesë edhe eurodeputetët e grupit të Konservatorëve dhe Reformistëve Evropianë (ECR), Chiara Gemma dhe Cristian Terheș. Gemma është nënkryetare e delegacionit të Parlamentit Evropian për Komitetin Parlamentar të Stabilizim-Asociimit BE-Shqipëri.
Takimi i KPSA-së zhvillohet në kuadër të mekanizmit të bashkëpunimit parlamentar mes Shqipërisë dhe Bashkimit Evropian dhe vjen pas mbledhjes së 21-të, e cila u zhvillua më 8-9 korrik në Strasburg. Sipas Parlamentit Evropian, në axhendën e takimeve të KPSA-së përfshihen çështje të lidhura me procesin e integrimit të Shqipërisë në BE, shtetin e së drejtës, të drejtat themelore, luftën kundër krimit të organizuar dhe korrupsionit, liritë e medias, zhvillimin e qëndrueshëm dhe bashkëpunimin rajonal.
Në fokus të takimit të këtij viti pritet të jetë edhe ecuria e negociatave të anëtarësimit. Grupi ECR, në njoftimin për pjesëmarrjen e eurodeputetëve të tij, vlerëson se Shqipëria ka hapur të gjashtë grup-kapitujt negociues dhe e konsideron vendin një partner të rëndësishëm për sigurinë dhe stabilitetin rajonal, edhe në kuadër të anëtarësimit në NATO.
Në të njëjtin njoftim theksohet rëndësia e zbatimit efektiv të reformave, forcimit të shtetit të së drejtës, zbatimit të legjislacionit të miratuar dhe reduktimit të polarizimit politik. ECR e lidh ecurinë e mëtejshme të procesit të anëtarësimit me cilësinë dhe zbatimin konkret të reformave.
KPSA BE-Shqipëri zhvillon dy takime në vit, një në Shqipëri dhe një në Parlamentin Evropian, në Bruksel ose Strasburg. Takimi i 22-të zhvillohet më 21 dhe 22 shtator në Tiranë.
