Mogillë, 6 gusht Zhurnal.mk – Gati dhjetë muaj pas zgjedhjeve lokale, anëtarët e këshillave zgjedhore në Komunën e Mogillës ende nuk i kanë marrë kompensimet për angazhimin e tyre. Nga Komisioni Shtetëror i Zgjedhjeve (KSHZ) bëjnë të ditur se, përveç Mogillës, edhe katër komuna të tjera – Kriva Pallanka, Çeshinovë-Obleshevë, Strumicë dhe Vallandovë – nuk i kanë paguar fare kompensimet, ndërsa në gjashtë komuna pagesat janë kryer vetëm pjesërisht.
“Përveç paralajmërimeve drejtuar komunave, të cilat janë bërë disa herë, si vitin e kaluar për të siguruar që në buxhetet komunale të planifikohen mjete për këtë qëllim, ashtu edhe këtë vit përmes disa shkresave, KSHZ-ja nuk ka kompetenca të tjera dhe as mekanizma për të detyruar zbatimin e obligimeve ligjore për pagesën e kompensimeve të organeve zgjedhore për Zgjedhjet Lokale 2025”, thuhet në reagimin e KSHZ-së.
Nga KSHZ-ja theksojnë se anëtarët e organeve zgjedhore duhet t’i kërkojnë të drejtat e tyre pranë komunave përkatëse, pasi pagesa e kompensimeve është obligim ligjor i tyre. Për shkak të rasteve të tilla, institucioni tashmë ka propozuar ndryshime në Kodin Zgjedhor.
“Propozojmë që KSHZ-ja ta marrë plotësisht përsipër pagesën e kompensimeve për të gjitha organet zgjedhore, për të gjitha llojet e zgjedhjeve dhe referendumet. Kemi konstatuar se sistemi aktual, me kompetenca të ndara mes KSHZ-së dhe komunave, krijon vonesa të panevojshme”, thuhet në njoftim.
Në muajin maj të këtij viti, KSHZ-ja siguroi pagesën e kompensimeve për 11 komuna me llogari të bllokuara. Komunat ku pagesat ende vonohen nuk bëjnë pjesë në këtë grup.
Zgjedhjet lokale u mbajtën më 19 tetor, ndërsa raundi i dytë më 2 nëntor të vitit të kaluar. Nga Komuna e Mogillës nuk kanë dhënë përgjigje se përse edhe pas dhjetë muajsh nuk janë paguar kompensimet për personat që administruan procesin zgjedhor.
