Opel po ndryshon mënyrën se si përdor emërtimin sportiv GSE, ndërsa risitë e para janë prezantuar te modeli Astra. Deri tani, shenja GSE ishte rezervuar për modelet më të fuqishme, por nga pranvera e vitit 2027 do të jetë në dispozicion edhe GSE Line, një paketë që sjell pamje sportive pavarësisht motorit.
Astra GSE Line do të prezantohet për herë të parë në panairin e automjeteve në Paris dhe gradualisht do të zëvendësojë nivelin aktual të pajisjeve GS. Ndryshe nga modelet e mirëfillta GSE, si Mokka GSE dhe Corsa GSE, të cilat janë versione elektrike me performancë më të lartë, GSE Line është kryesisht paketë pajisjesh dhe dizajni.
Te Astra, GSE Line do të mund të kombinohet me lloje të ndryshme motorësh, përfshirë versionet plotësisht elektrike, hibride plug-in, hibride të lehta, si dhe motorët tradicionalë me djegie të brendshme.
– YouTube www.youtube.com
Astra GSE Line do të dallohet nga detajet sportive në pjesën e jashtme, përfshirë elementet nën maskën karakteristike Vizor dhe një emblemë të veçantë në parakolp. Standardisht do të ketë fellne alumini 17-inç Diamond Cut, ndërsa 18-inçët do të jenë opsion me pagesë shtesë.
Në brendësi do të ketë qepje kontrastuese të verdha në ulëse, timon, veshjet e dyerve dhe mbështetësen qendrore të krahut, si dhe pedale sportive prej alumini. Për disa versione të motorëve do të ofrohen edhe ulëse sportive me mbështetëse të integruara për kokën dhe mbështetje më të theksuar anësore.
Opel ka paralajmëruar gjithashtu një Astra më të fuqishme me 280 kuaj fuqi, e cila pritet të prezantohet gjatë vitit 2027. Pas Astrës, kompania synon ta zgjerojë paketën GSE Line edhe në modelet e tjera. Detajet e plota dhe informacionet për fillimin e shitjeve do të bëhen të ditura gjatë panairit të automjeteve në Paris.
