Tetovë/Shkup, 5 mars, Zhurnal.mk – Me rastin e përvjetorit të Epopeja e UÇK-së, kryetari i Komunës së Tetovës dhe lideri i Lëvizja BESA, Bilall Kasami, ka përkujtuar sakrificën e Adem Jashari dhe familjes Jashari, duke theksuar se qëndresa e tyre në Prekaz përbën themelin e lirisë dhe shtetit të Kosovë.
Përmes një mesazhi të publikuar në Facebook, Kasami u shpreh se ngjarjet e marsit në Prekaz përfaqësojnë një nga kapitujt më të lavdishëm të historisë kombëtare shqiptare.
“Sot kujtojmë Epopesë e UÇK-së, ditët kur në Prekaz u shkrua një nga kapitujt më të lavdishëm të historisë sonë kombëtare. Qëndresa heroike e Adem Jasharit dhe familjes Jashari ishte mesazhi i fuqishëm se populli shqiptar nuk dorëzohet përballë padrejtësisë. Nga Prekazi u ngrit zëri i një kombi që kërkonte dinjitet, liri dhe të drejtën për të jetuar i lirë në tokën e vet. Ajo sakrificë u bë themel i shtetit të Kosovës dhe frymëzim për çdo shqiptar. Lavdi e përjetshme Adem Jasharit, familjes Jashari dhe të gjithë dëshmorëve të kombit!”, ka shkruar Kasami, transmeton Zhurna.mk.
Me rastin në fjalë nuk ka munguar komenti edhe i ish-kryetarit të “ALTERNATIVA”-së, Zeqirija Ibrahimi, i cili theksoi se sakrifica e familjes Jashari mbetet busull orientimi për brezat e sotëm.
“Lavdi e lutje! 28 vjet kujtim me përulësi, dhimbje e mburrje! Adem Jashari dhe të gjithë ata që pushojnë në këto varre, duke e kaluar pragun e jetës së kësobotshme, na mësuan se jeta nuk ka kuptim pa liri. Andaj, ata në vend të robërisë së turpshme zgjodhën përjetësinë e lavdishme. Sakrifica e tyre u shndërrua në epope që sot është busull e orientimit tonë kombëtar e njerëzor. Qoftë i përjetshëm kujtimi për ta!”, ka shkruar Ibrahimi.
Ndërkohë, edhe sekretari organizativ i Lëvizja BESA dhe përfaqësues i koalicionit VLEN, Adnan Azizi, përmes një postimi në rrjetet sociale theksoi se figura e Adem Jasharit mbetet simbol bashkimi për të gjithë shqiptarët.
“Nuk ka figurë më unifikuese sesa ajo e komandantit legjendar Adem Jashari. Lufta e tij heroike dhe sakrifica sublime e Jasharajve për liri, bashkoi tërë kombin, pa dallim feje, krahine e ideje. Lavdi pafund familjes Jashari, nënë Zaides, bacit Shaban, bacit Hamzë e Adem Jasharit!”, ka shkruar Azizi.
Epopeja e UÇK-së shënon qëndresën heroike të familjes Jashari në mars të vitit 1998 në Prekaz, ngjarje që konsiderohet një nga momentet kyçe në historinë e luftës për lirinë e Kosovës, transmeton Zhurna.mk.
