Palermo, 28 maj, Zhurnal.mk – Gjatë një operacioni ndërkombëtar të koordinuar nga Drejtoria Rajonale Antimafia e Palermos dhe të zhvilluar nga Guardia di Finanza e kryeqytetit sicilian, janë arrestuar tre persona për përdorim të parave me origjinë të paligjshme, me rrethanë rënduese favorizimin e mafias, ndërsa janë sekuestruar pasuri, kompani dhe mjete financiare me vlerë mbi 200 milionë euro.
Operacioni, i zhvilluar në disa vende, bëri të mundur rindërtimin e një pasurie gjigante të krijuar nga riinvestimi, edhe përmes kompanive offshore, i fitimeve të siguruara që nga vitet ’80 nga trafiku i narkotikëve nën drejtimin e bosit mafioz, Matteo Messina Denaro.
Hetimet, të koordinuara nga prokurori Maurizio de Lucia dhe zëvendësi i tij Vito Di Giorgio, u zhvilluan jo vetëm në Itali, por edhe në Andorra, Gjibraltar, Ishujt Kajman, Luksemburg, Zvicër, Liban, Principatën e Monakos dhe Spanjë, në qytetet Malaga, Marbella, Benahavis dhe Puerto Banús, në bashkëpunim të ngushtë me autoritetet vendase gjyqësore dhe policore.
“Shpreh mirënjohjen time më të thellë për Prokurorinë e Palermos, Drejtorinë Rajonale Antimafia, Guardia di Finanza dhe të gjitha autoritetet gjyqësore dhe hetimore italiane e të huaja të përfshira në operacionin e gjerë ndërkombëtar që çoi në tre masa arresti dhe sekuestrimin e pasurive dhe mjeteve financiare me vlerë mbi 200 milionë euro, që lidhen me pasurinë e grumbulluar ndër vite nga Matteo Messina Denaro dhe bashkëpunëtorët e tij”, tha prokurori i Palermos Maurizio De Lucia.
